सातारा : भाजपचे किरीट सोमय्या (Kirit Somaiya) यांचा वादग्रस्त व्हिडिओ सोशल मीडियावर व्हायरल झाल्यामुळे खळबळ उडाली आहे. साताऱ्यात काँग्रेसच्या (Congress) महिला आघाडीच्या वतीने सोमय्या यांच्या प्रतिमेस जोडे मारण्यात आले. त्यांची प्रतिमा पायदळी तुडवून निषेध नोंदवला.

काँग्रेसच्या महिला जिल्हाध्यक्षा अल्पना यादव यांच्या नेतृत्वाखाली काँग्रेस भवनासमोर आंदोलन झाले. या वेळी धनश्री महाडिक, रजनी पवार, रजिया शेख, मालन परळकर, माधवी वर्पे, वहिदा खान, नसीम बागवान, नरेश देसाई, मनोजकुमार तपासे आदी उपस्थित होते. या वेळी खासदार सोमय्या यांच्या निषेधाच्या घोषणा देण्यात आल्या.

काँग्रेस भवनासमोर सोमय्या यांच्या प्रतिमेस जोडे मारण्यात आले, तसेच त्यांची प्रतिमा पायदळी तुडवत त्यांचा निषेध करण्यात आला. या वेळी अल्पना यादव म्हणाल्या, ‘‘किरीट सोमय्या हे प्रत्येकाला ईडीची भीती दाखवून चुरुचुरू बोलत होते. आज त्यांचीच सीडी बाहेर आली आहे. त्यांनी महिलांवर अत्याचार केले आहेत.

त्याबाबतचे व्हिडिओ सोशल मीडियाच्या माध्यमातून व्हायरल झाले आहेत. राज्यात महिला सुरक्षित नाहीत, हे यातून दिसून येत आहेत.’’ महिला आयोगाच्या अध्यक्षा रूपाली चाकणकर व भाजपच्या नेत्या चित्रा वाघ आता काय झोपल्या आहेत का, असा प्रश्न उपस्थित करून यादव यांनी काँग्रेसच्या महिला सोमय्यांचे पितळ उघडे करणार असल्याचे सांगून निषेध व्यक्त केला.