ढेबेवाडी : येथील एका व्यावसायिकाचा मृतदेह काल (मंगळवार) सकाळी मराठवाडी धरणाच्या (Marathwadi Dam) जलाशयात आढळून आला. शिवाजी लक्ष्मण कोळेकर (वय ५०, मूळगाव कोळेकरवाडी, सध्या रा. ढेबेवाडी, ता. पाटण) असे नाव असून, दोन दिवसांपासून ते बेपत्ता होते.

याबाबतची माहिती अशी, कोळेकर कुटुंबीय अनेक वर्षांपासून येथे स्थायिक असून, येथे त्यांचे हार्डवेअर दुकान आहे. शिवाजी कोळेकर हे रविवारी (ता. पाच) दुपारी घरातून निघून गेले होते. मात्र, उशिरापर्यंत ते घरी न परतल्याने कुटुंबीय व नातेवाइकांनी त्यांचा शोध घेतल्यावर मेंढ (ता. पाटण) गावाजवळ मराठवाडी धरणाच्या जलाशयाच्या परिसरात रस्त्याकडेला त्यांची दुचाकी आढळून आली.

नातेवाइकांनी येथील पोलिस ठाण्यात (Dhebewadi Police) ते बेपत्ता झाल्याची खबर दिली होती. दोन दिवसांपासून जलाशय व परिसरात त्यांचा शोध सुरू होता. काल सकाळी जलाशयात मृतदेह तरंगत असल्याचे आढळून आल्यानंतर पोलिसांना कळविण्यात आले. शिवाजी कोळेकर यांचाच मृतदेह असल्याचे नातेवाइकांनी ओळखले. कऱ्हाड येथे उत्तरीय तपासणीनंतर मृतदेह नातेवाइकांच्या ताब्यात देण्यात आला. सायंकाळी येथे अंत्यसंस्कार करण्यात आले.

कोळेकर यांचा सामाजिक, धार्मिक, शैक्षणिक कार्यातून हिरिरीने सहभाग असायचा. ते उमरकांचन विविध कार्यकारी सहकारी सोसायटीचे माजी अध्यक्ष व संचालक होते. माजी पंचायत समिती सदस्य लक्ष्मणराव कोळेकर यांचे ते सुपुत्र, तर पाटण शेती उत्पन्न बाजार समितीचे माजी उपसभापती दिलीपराव कोळेकर यांचे बंधू होत. त्यांच्या मागे वडील, पत्नी, दोन मुलगे, मुलगी, भाऊ, बहीण असा परिवार आहे. पाण्यात बुडून मृत्यू झाल्याचा पोलिसांचा प्राथमिक अंदाज आहे. सहायक पोलिस निरीक्षक अभिजित चौधरी तपास करत आहेत.