सातारा : शहरातील मोकाट कुत्र्यांचा तातडीने बंदोबस्त करावा, शहरामध्ये केंद्र शासनाच्या अमृत योजनेतून लावलेल्या झाडांची निगा राखावी, अशी मागणी नगरसेवक धनंजय जांभळे यांनी जिल्हाधिकारी शेखर सिंह यांच्याकडे निवेदनाव्दारे केली आहे.

निवेदनात म्हटले आहे, की सातारा शहरामध्ये मोकाट कुत्र्यांचा वावर वाढला असल्याने लहान मुलांना, तसेच ज्येष्ठ नागरिकांना चावा घेण्याच्या प्रकारात वाढ झाली आहे. या संदर्भात वृत्तपत्रात बातम्या प्रसिध्द झाल्या आहेत. याबाबत वरवर नगरपालिका प्रशासनाकडे तक्रारी केल्या असूनही त्यावर अद्याप कोणतीही कार्यवाही झाली नाही. मोकाट कुत्र्यांच्या वावर यामुळे शहरातील जनतेमध्ये प्रचंड नाराजी पसरली असून आपण त्याचा त्वरित बंदोबस्त होण्याबाबत संबंधितांना आदेश द्यावेत. 

कृषीच्या विद्यार्थ्यांना गावातच परीक्षेची मुभा!, कोरोनामुळे विद्यापीठाचा निर्णय 

सातारा पालिका हद्दीमध्ये केंद्र शासनाने अमृत योजनेअंतर्गत कोट्यवधी रुपयांचा निधी खर्चून झाडे लावली व त्यांची देखभाल करण्याचे काम दिले होते. ती एजन्सी कोणत्याही प्रकारे या झाडांची देखभाल करत नाही. या संदर्भात वारंवार सूचना देऊनही पालिका प्रशासन व एजन्सी कोणत्याही प्रकारे कार्यवाही करत नाही. त्यामुळे मोठ्या प्रमाणात निधी खर्च करुन सातारा शहराच्या सौंदर्यामध्ये शोभा येत नसेल तर याची दखल घेऊन शहरामध्ये केंद्र शासनाच्या अमृत योजनेतून लावलेल्या झाडांची निगा राखावी, या मागणीचे निवेदन नगरसेवक जांभळे यांनी दिले आहे. दरम्यान, या निवेदनाचा पालिका प्रशासन विचार करणार का हे महत्वाचे ठरणार आहे.