फलटण शहर : श्री संत ज्ञानेश्‍वर महाराज पालखी (Dnyaneshwar Maharaj Palkhi) सोहळा फलटण (Phaltan) मुक्कामी असताना सोहळ्यातील वारकरी (Warkari), दिंडीकरी तसेच दर्शनासाठी येणाऱ्या भाविकांची कसलीही गैरसोय होऊ नये, याची खबरदारी प्रशासनाने घ्यावी.

यासोबतच वारकऱ्यांसाठी (Pandharpur Wari) जास्तीतजास्त सुविधा उपलब्ध करून देण्यावर प्रशासनाने भर द्यावा, असे निर्देश सार्वजनिक बांधकाममंत्री रवींद्र चव्हाण (Ravindra Chavan) यांनी दिले. सार्वजनिक बांधकाममंत्री चव्हाण यांनी काल येथे पालखी तळाची पाहणी केली. त्यावेळी ते बोलत होते.

या वेळी भारतीय जनता पक्षाचे जिल्हाध्यक्ष आमदार जयकुमार गोरे, प्रांताधिकारी डॉ. शिवाजीराव जगताप, तहसीलदार समीर यादव, मुख्याधिकारी संजय गायकवाड, स्वराज पतसंस्थेचे चेअरमन अभिजित नाईक-निंबाळकर यांच्यासह भारतीय जनता पक्षाचे पदाधिकारी उपस्थित होते.

फलटणचा पालखी तळ प्रशस्त असल्याने या ठिकाणी मानाच्या सर्व दिंड्या एकाच ठिकाणी बसत असून, या ठिकाणी कोणतीही अडचण येणार नाही, याची खबरदारी प्रशासनाने घेणे गरजेचे आहे. यासोबतच नोंदणी नसलेल्या दिंड्यांचीही विशेष व्यवस्था करावी, असे श्री. चव्हाण यांनी सांगितले.

जिल्ह्यातील इतर पालखी तळांच्या तुलनेमध्ये फलटणचा पालखी तळ भव्यदिव्य असून, येथे पालखी सोहळ्याच्या सर्व बाबींचे योग्यरीत्या नियोजन केले जाते. श्री संत ज्ञानेश्‍वर महाराज पालखी सोहळा समिती व प्रशासनाच्या माध्यमातून फलटण पालखी तळावर कोणतीही कमतरता भासू देणार नाही, याची ग्वाही प्रांताधिकारी डॉ. जगताप यांनी या वेळी दिली.