गोंदवले (सातारा) : येथील सातारा-लातूर महामार्गालगत (Satara-Latur Highway) असलेल्या संतोषी स्टील फर्निचर अॅण्ड इलेक्ट्रॉनिक या (Santoshi Steel Furniture and Electronic) दुकानाला आज पहाटे साडेतीनच्या सुमारास भीषण आग लागून लाखो रुपयांचं नुकसान झालं. तर, आग विझवताना चार जण किरकोळ जखमी झाले. शॉर्ट सर्किटनं आग लागल्याचा प्राथमिक अंदाज व्यक्त होत आहे.

याबाबत घटनास्थळावरून मिळालेली माहिती अशी, आज पहाटे साडेतीनच्या सुमाराला या दुकानाला आग लागली. या दुकानाला लागून राहत असलेल्या नवले कुटुंबाच्या निदर्शनास ही आग आली. त्यावेळी दौलत नवले यांनी दुकान मालक नामदेव भिंगारे यांना हाका मारून बोलावलं. त्यानंतर दुकानाचं शटर उघडलं असता, दुकानाच्या समोरील भागात भीषण आग लागल्याचं दिसलं. लोकांच्या आरडाओरड्यानं परिसरातील इतर लोकांनीही घटनास्थळी धाव घेतली. दुकानाशेजारील हातपंपाचे पाणी उपसून लोकांनी आग विझविण्याचा प्रयत्न केला. मात्र, आग आटोक्यात येत नव्हती.

त्यामुळं गावातून ग्रामपंचायत सदस्य गुरुदत्त कुलकर्णी यांना फोन करून त्यांचा पाण्याचा खासगी टँकर बोलवण्यात आला. त्यानंतर बऱ्याच वेळानं ही आग आटोक्यात आणण्यात यश आलं. या आगीत दुकानातील विद्युत इन्व्हर्टरसाठीच्या बॅटऱ्या फुटल्या. तसेच दुकानातील इतर फर्निचर व माल जाळून खाक झाल्यानं लाखो रुपयांचं नुकसान झाल्याचा प्राथमिक अंदाज व्यक्त होत आहे. आग लागल्याचं समजताच दहिवडी पोलीस (Dahiwadi Police) घटनास्थळी दाखल झाले. अग्निशामक यंत्रणा मात्र वेळेवर पोचू शकली नव्हती. दरम्यान, दुकानाला लागलेली आग विझविण्यासाठी मालक नामदेव भिंगारे व ज्ञानेश्वर भिंगारे यांच्यासह त्यांची मुलं आग विझविताना किरकोळ जखमी झाले.