पाटण : शेततळ्यातील पाण्यात भावाचा पाय घसरुन तो बुडत असताना मदतीसाठी धावलेल्या बहिणाचाही बुडुन मृत्यू झाल्याची दुर्दैवी घटना आज सायंकाळी पाचच्या सुमारास पाटण तालुक्यातील येराडजवळील रोमनवाडी येथे घडली. त्यामुळे खळबळ उडाली असुन हळहळ व्यक्त होत आहे. सौरभ अनिल पवार (वय १७) व पायल अनिल पवार (वय 14, दोघेही रा. काठी-अवसरी, सध्या रा. विजयनगर) अशी संबंधित मृत्यु झालेल्या मुलांची नावे आहेत.

याबाबत स्थानीकांकडुन मिळालेल्या माहिती अशी ः येराडजवळील रोमनवाडी येथील परशराम सावंत (रा. सातारा) यांच्या फार्म हाऊसवर रोमनवाडी येथील सचिन जाधव हे कामास आहेत. त्यांच्याकडे पाहुणे म्हणुन अनिल पवार हे आपल्या पत्नी व दोन मुलांसमवेत तेथे गेले होते. तेथे सचीन जाधव, अनिल पवार व त्यांच्या पत्नी या बोलत बसल्या होत्या. त्यादरम्यान सौरभ आणि पायल हे दोघे बहिण भाऊ पळत शेततळ्याकडे गेली. तेथे सौरभचा पाय पाण्यातुन घसरल्याने तो शेततळ्यात बुडत असताना त्याला वाचवायला बहिण पायल गेली. त्यादरम्यान तीही बुडु लागली.

ही बाब सचीन जाधव व मुलाचे आई वडील यांच्या लक्षात येताच ते धावत तेथे गेले. मात्र ती तोपर्यंत ते दोघेही पाण्यात बुडाली होते. रात्री उशीरा शिरळ येथील मच्छीमारांनी त्या मुलांचे मृतदेह शेततळ्यातील पाण्याबाहेर काढले. पाटणचे पोलिस उपनिरीक्षक महेश पाटील, पोलिस कर्मचारी, सरपंच प्रकाश साळुंखे, तलाठी पी. जी. शिंदे यांनी घटनास्थळी धाव घेतली. सौरभ याला नुकताच रेठरे बुद्रुक येथील आय टी आय कॉलेजला प्रवेश मिळाला होता. तर पायल ही विजयनगर येथे विद्यालयात आठवीमध्ये शिकत होती. या घटनेने मोठी हळहळ व्यक्त होत आहे.