सातारा : भारतीय जनता पक्षाच्या (BJP) जिल्हाध्यक्षपदी आमदार जयकुमार गोरे (Jayakumar Gore) यांची नियुक्ती करण्यात आलीय. याबाबतची घोषणा भाजपचे प्रदेशाध्यक्ष चंद्रकांत पाटील (Chandrakant Patil) यांनी नुकतीच केली. आगामी निवडणुका आणि पक्ष संघटना वाढविण्यासाठी आमदार गोरेंवर भाजपनं मोठी जबाबदारी दिलीय. दरम्यान, विद्यमान जिल्हाध्यक्ष विक्रम पावसकर (Vikram Pawaskar) यांना प्रदेशवर संधी देताना त्यांची प्रदेश सचिवपदी नियुक्ती केलीय.

भारतीय जनता पक्षानं आगामी निवडणुका डोळ्यासमोर ठेऊन जिल्हाध्यक्ष बदलला असून, प्रथमच आमदाराकडं जिल्हाध्यक्षपदाची जबाबदारी दिली आहे. त्यानुसार जिल्हाध्यक्षपदी आमदार गोरे यांची नियुक्ती केली आहे. प्रदेशाध्यक्ष चंद्रकांत पाटील यांनी याबाबतची घोषणा केली. दरम्यान, मुंबईतील महाराष्ट्र नवनिर्माण सेनेच्या (MNS) लीगल सेलचे महासचिव अखिलेश चौबे यांनी आज भारतीय जनता पक्षात प्रवेश केला. प्रदेशाध्यक्ष पाटील यांनी त्यांचे स्वागत केले. प्रदेश उपाध्यक्ष कृपाशंकर सिंग, प्रदेश सरचिटणीस श्रीकांत भारतीय या वेळी उपस्थित होते.निवडीनंतर चंद्रकांत पाटील यांनी बुके देऊन आमदार गोरे यांचे अभिनंदन करून पुढील वाटचालीस शुभेच्छा दिल्या.

भारतीय जनता पक्षाचे जिल्ह्यात एक खासदार व दोन आमदार आहेत. आगामी जिल्हा परिषद (Zilla Parishad), पंचायत समिती, पालिका व बाजार समितींच्या निवडणुका डोळ्यासमोर ठेऊन जिल्ह्यात पक्ष संघटना वाढविण्यासाठी प्रथमच एका आमदाराकडे जिल्हाध्यक्षपदाची धुरा भाजपने दिली आहे. आमदार गोरे यांनी विधानसभेच्या अधिवेशनात विविध प्रश्नांवर आवाज उठवला आहे. त्यांचा आक्रमकता लक्षात घेऊन जिल्ह्यात राष्ट्रवादीला टक्कर देण्याची भाजपची रणनीती असणार आहे. आमदार गोरेंच्या या निवडीमुळे जिल्हा भाजपमध्ये आनंदाचे वातावरण निर्माण झाले आहे.