सातारा : कोयना धरणावरील (Koyna Dam) शिवसागर जलाशयावर (Shivsagar Reservoir) मुनावळे (ता. जावळी) येथे जागतिक दर्जाचे जलपर्यटन (Water Tourism) विकसित करण्याच्या कामास शासनाने मंजुरी दिली आहे. यासाठी ४५ कोटी ३८ लाख रुपये मंजूर झाले आहे. या निर्णयामुळे सातारा जिल्ह्यातील पर्यटन वाढीस चालना मिळणार आहे.

जलपर्यटन प्रकल्पाचे बांधकाम हे महाराष्ट्र कृष्णा खोरे विकास महामंडळ (Maharashtra Krishna Khore Vikas Mahamandal) यांच्याद्वारे करण्यात येणार आहे. बांधकामाचा खर्च हा पर्यटन विभागामार्फत महाराष्ट्र पर्यटन विकास महामंडळास दिला जाणार आहे. जल पर्यटनाशी संबंधित कामकाज, तसेच प्रकल्पाचे प्रचालन हे महाराष्ट्र पर्यटन विकास महामंडळ यांच्यामार्फत राबविण्यात येईल.

प्रकल्पाची अंमलबजावणी महाराष्ट्र पर्यटन विकास महामंडळ आणि महाराष्ट्र कृष्णा खोरे विकास महामंडळाबरोबर करण्यात येणाऱ्या सामंजस्य करारातील तरतुदीनुसार करण्यात यावी, असे शासनाने स्पष्ट केले आहे. कोयना धरण ‘शिवसागर जलाशय’ यावर मुनावळे येथे जागतिक दर्जाचे जलपर्यटन विकसित करण्याबाबत त्यानुसार प्रकल्पाची व्यवहारात, वित्तीय बाबी तपासून अनुसरून शासनाने मान्यता दिली आहे.

दरम्यान, पहिल्या टप्यातील खर्चासाठी सन २०२३-२४ च्या अर्थसंकल्पीय तरतुदीतून १३ कोटी ६१ लाख वितरित करण्यास शासन निर्णयाद्वारे मान्यता दिली आहे. गुणनियंत्रण यंत्रणेद्वारे कामाची प्रत्यक्ष गुणवत्ता तपासणी केल्याचा प्रमाणित अहवाल, तसेच काम पूर्ण झाल्यानंतर पूर्णत्वाचा सचित्र दाखला आणि निधीबाबतचे उपयोगिता प्रमाणपत्र न चुकता महामंडळामार्फत शासनास सादर करण्यात यावे. त्यानंतर पुढील उर्वरित निधी वितरित केला जाईल.

वीस महिन्यांत काम होणार पूर्ण

जलपर्यटन विकसित करण्याकरिता पहिला टप्पा आठ महिन्यांत आणि दुसरा टप्पा २० महिन्यांत पूर्ण करण्यात यावा. जलपर्यटन विकसित करण्याची कार्यवाही कोयना धरण (शिवसागर जलाशयाच्या) ‘अ’ वर्ग प्रतिबंधित क्षेत्रात होणार नाही, याची दक्षता घ्यावी. पर्यटकांसाठी नियमानुसार आवश्यक त्या विमा सवलती व वैद्यकीय सोयीसुविधा उपलब्ध द्याव्यात. पर्यावरणाचा ऱ्हास होणार नाही, तसेच जलपर्यटन क्षेत्रात कोणत्याही प्रकारचे प्रदूषण होणार नाही, याची दक्षता घेऊन जलाशयात मलजलप्रक्रिया केंद्र उभारणे, पर्यावरणस्नेही बोटींचा वापर करण्याचे आदेश शासनाने दिले आहेत.

पर्यटनास मिळेल चालना - शिवेंद्रसिंहराजे

मुनावळे येथे जागतिक दर्जाच्या वॉटर स्पोर्ट्स, जलपर्यटनाला मंजुरी दिल्याबद्दल आमदार शिवेंद्रसिंहराजे भोसले यांनी मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार यांचे आभार मानले आहेत. या निर्णयामुळे मुनावळे, कास, बामणोली या भागातील पर्यटनवाढीला चालना मिळणार असून, स्थानिकांना रोजगाराच्या संधी निर्माण होणार असल्याचा विश्‍वास शिवेंद्रसिंहराजे भोसले यांनी व्यक्त केला. (Tourism will get a boost - Shivendrasimharaje)