सातारा: राज्यभरात लसीकरण मोहिमेत सातारा जिल्हा अग्रेसर ठरत आहे. जिल्ह्यात आतापर्यंत सर्वाधिक लस काल कोव्हिशिल्ड एक लाख ७० हजार, तर कोव्हॅक्सिनचे बारा हजार ४८० डोस उपलब्ध झाले आहेत. त्यामुळे जिल्ह्यात आज (शुक्रवार) मोठ्या प्रमाणात लसीकरण होणार आहे. या मोहिमेसाठी लसीकरण सत्रांचीही संख्या ३५० हून अधिक ठेवण्यात आली आहे.

जिल्ह्यात एक जानेवारीपासून लसीकरणास सुरुवात झाली. सुरवातीच्या तीन ते चार महिन्यांत लशीचे डोस मोठ्या संख्येने उपलब्ध होत होते. त्यानंतर लशींचे डोस कमी येण्यास सुरवात झाल्याने मोहिम मंदावली होती. मात्र, मागील तीन महिन्यांपासून लशींची संख्या मोठ्या प्रमाणात उपलब्ध झाल्याने मोहिमेला वेग येत आहे.

लसीकरण सुरू झाल्यापासून आतापर्यंत सर्वाधिक एक लाख ४७ हजार लस जिल्ह्याला उपलब्ध झाली होती. त्यानंतर काल सर्वाधिक सुमारे पावणेदोन लाख लशींचे डोस उपलब्ध झाले आहेत. त्यामुळे शहरासह ग्रामीण भागात लसीकरण केंद्रांवर गर्दी होण्याची शक्यता आहे. दरम्यान, केंद्राकडून राज्याला लशीचे डोस जादा प्रमाणात उपलब्ध झाल्याने जिल्ह्याला मोठ्या प्रमाणात लस मिळाली आहे. दरम्यान, जिल्ह्यातील सातारा, कऱ्हाड, फलटण, वाई व कोरेगाव या पाच शहरात ऑनलाइन नोंदणीनुसार, तर इतर ठिकाणी टोकन पद्धतीने लसीकरण प्रक्रिया होणार असल्याचे आरोग्य विभागाने स्पष्ट केले आहे.

जिल्ह्याला लशींचे डोस मोठ्या प्रमाणात उपलब्ध झाल्याने आरोग्य केंद्रावर योग्य नियोजन करण्यात आले आहे. या मोहिमेसाठी लसीकरण सत्रांचीही संख्या वाढविण्यात आली असून, पुढील काळातही जिल्ह्याला जास्तीतजास्त लशींचे डोस मिळण्यासाठी प्रयत्न करणार आहे.

- डॉ. प्रमोद शिर्के; नोडल अधिकारी, लसीकरण विभाग