सातारा : परळी खोऱ्यातील काळोशी (ता. सातारा) येथील सूरज लक्ष्मण लामजे (वय 28) या जवानाचा लडाख (जम्मू काश्मीर) येथे हे अपघाती मृत्यू झाला. ही घटना शुक्रवारी रात्री बाराच्या सुमारास घडली. सूरज यांचे पार्थिव रविवारी रात्री उशिरा सातारा जिल्ह्यात आणण्यात आले. तद्नंतर रात्री दहाच्या सुमारास त्यांच्यावर शासकीय इतमामात अंत्यसंस्कार करण्यात आले.

हुतात्मा सूरज लामजे यांच्या घरातच सैनिकी वारसा आधीपासूनच होता. त्यातूनच आपणही देशाचे काही तरी देणे लागतो. या भावनेतून ते सैन्यात भरती झाले. कुरुन गावचे सुपुत्र सूरज लामजे हे सन 2014 मध्ये मुंबई लष्करात भरती झाले होते. त्यानंतर बंगळूर येथे त्यांचे प्रशिक्षण झाले. सध्या ते लडाख येथे कर्तव्य बजावत होते. सूरज हे चालक असल्याने शुक्रवारी रात्री बाराच्या सुमारास सैन्यदलातील साहित्य घेऊन जात असताना त्यांचे वाहन दरीत कोसळले व त्यातच त्यांचा मृत्यू झाला. 

लडाखाच्या दरीत जवानाचा मृत्यू; परळी खाे-यात हळहळ 

लामजे यांना गावच्या विकासाबरोबरच गावाला जिल्ह्यात एक नवी ओळख करण्याचा त्यांचा मानस होता. हुतात्मा सूरज लामजे यांचा विवाह दोन वर्षांपूर्वी झाला. त्यांना 3 महिन्याचा एक मुलगा आहे. सूरज यांची चिमुरड्या मुलाशी एकदाही भेट झाली नाही. कधी सोशल मीडियाद्वारे पाहणेही झाले नसल्याचे ग्रामस्थांनी सांगितले. कर्तव्यनिष्ठ जिल्ह्याचे सुपुत्र हरवल्याने काळोशी गावासह संपूर्ण जिल्ह्यात शोककळा पसरली आहे. हुतात्मा सूरज लामजे यांच्या पश्चात एक भाऊ, बहीण आई-वडील, आजी, पत्नी व लहान मुलगा असा परिवार आहे.

प्रत्येक शहीद जवानामागे एक झाड : सयाजी शिंदेंची संकल्पना

3 महिन्यांच्या चिमुरड्याला पाहताच अनेकांना अश्रू अनावर 

हुतात्मा लामजे यांच्या अशा अचानक जाण्याने संपूर्ण जिल्ह्यावर शोककळा पसरली आहे. लामजे यांचे पार्थिव जसे बोगद्यातून बाहेर आपल्या गावाकडे निघू लागले. तेव्हा डबेवाडी, माणेवाडी, भोंदावडे या गावातील ग्रामस्थांनी रस्त्यावरून हुतात्मा सूरज लामजे अमर रहेच्या घोषणांनी संपूर्ण भाग दणाणून सोडला होता. अनेकांच्या डोळ्यात अश्रू दाटले होते. लामजे यांच्या 3 महिन्याच्या मुलाकडे पाहताना अनेकांनी हंबरडा फोटत अश्रूंना वाट मोकळी करुन दिली. संपूर्ण परिसर लामजे यांच्या जाण्याने शोकसागरात होता.