मसूर (सातारा): निसर्गाच्या लहरीपणामुळे अगोदरच पाऊस काळ कमी असल्याने दुष्काळासारखी स्थिती निर्माण झाली आहे. त्यातच कोरोना महामारीचे संकट आहे. या कात्रीत सापडलेल्या विभागातील शेतकऱ्यांच्या आरफळ कालव्यावर बसवण्यात आलेल्या अनेक विजेच्या मोटारी चोरीला गेल्या आहेत. मात्र, पोलिस शेतकऱ्यांची तक्रार घेण्यास टाळाटाळ करत आहेत. सहा महिन्यांपासून विहीर, कालव्यावरील विद्युत मोटर चोरीचे सत्र सुरूच आहे.

मार्चपासून विभागात विजेच्या मोटारी चोरीचे सत्र सुरू आहे. त्याचा फटका विभागातील मसूरसह कालगाव, हेळगाव, हणबरवाडी, खराडे, माळवाडी, रिसवड, शहापूर आदी ठिकाणच्या शेतकऱ्यांना बसला आहे. काही शेतकऱ्यांना आठ महिन्यांत एकाच विहिरीवरील मोटर दोनदा चोरीस गेल्याचे प्रकार घडले आहेत. आठ दिवसांपासून कालगावचे प्रवीण शंकर पवार, उत्तम शंकर पवार, माळवाडी हद्दीतून शिवाजी देसाई, रिसवडच्या दोन विद्युत मोटारी चोरीला गेल्या आहेत. चोरट्यांनी मोटरच्या दोन्ही बाजूचे जोडलेल्या पाइपचे नट बोल्ट खोलून मोटरच नेल्या आहेत.

या मोटारींची किमती सरासरी २० ते ५० हजारांपर्यंत आहेत. शेतकऱ्यांच्या विहिरीवरील, कालव्यावरील विद्युत मोटर चोरीला गेल्यावर पोलिसांत तक्रार देण्यास गेलेल्या शेतकऱ्यांची तक्रार लवकर नोंदवून घेतली जात नाही. तक्रार नोंदवून घेण्यास टाळाटाळ केली जात असल्याचे शेतकऱ्यांचे म्हणणे आहे. गेल्या सहा महिन्यांपासून चोरीला गेलेल्या मोटारींची तक्रार पोलिस ठाण्यात नोंदवली असली, तरी अद्याप मोटारीचा तपास लावण्यात पोलिसांना अपयश आले आहे.

पोलिसांपुढे तपासाचे मोठे आव्हान

मसूर पोलिस दूरक्षेत्रात आरफळ कालव्यावरील विजेच्या मोटारी चोरीला गेलेल्या शेतकऱ्यांना तक्रारीसंदर्भात टाळाटाळ केल्याने काही शेतकऱ्यांनी तक्रारी पोलिसांत दाखल केल्या नाहीत. पोलिसांबाबत विश्वासार्हता नसल्याचे शेतकऱ्यांचे म्हणणे आहे. मोटारी चोरणारी सराईत टोळी असावी, असा अंदाज व्यक्त होत असून, या टोळीच्या तपासाचे मोठे आव्हान पोलिसांपुढे आहे.