ढेबेवाडी (सातारा) : बाजार समित्या व अन्य ठिकाणी जीवनावश्यक मालाच्या चढ-उताराचे काम करणा-या माथाडी कामगार व अन्य घटकांचा अत्यावश्यक सेवेत समावेश करून त्यांना प्रवासाच्या परवानगीसह विमा संरक्षण द्यावे, या मागणीकडे शासनाचे लक्ष वेधण्यासाठी माथाडी कामगारांनी आज नरेंद्र पाटील यांच्या नेतृत्वाखाली मुंबई परिसरातील विविध रेल्वे स्थानकाबाहेर रेल्वेच्या आधिकाऱ्यांना निवेदने देवून महाराष्ट्र व कामगार दिन साजरा केला.

कोरोना संसर्गाच्या काळात गेल्यावर्षी आणि आत्तासुद्धा जीवनावश्यक सेवा सुरळीत राहण्यासाठी माथाडी कामगारांसह सलग्न अन्य घटक जीवावर उदार होवून सेवा बजावत आहेत. बाजार समितीच्या आवारात अन्न-धान्य, कांदा बटाटा, मसाले, भाजी, फळे, गॅस सिलिंडर आदी जीवनावश्यक मालाची तसेच जनावरांचे खाद्य व खतांच्या चढ-उताराची कामे त्यांच्यामार्फत सुरू आहेत. ही सेवा बजावताना अनेक माथाडी कामगारांना कोरोनाची लागण झाली. काहींचा त्यामध्ये मृत्यूही झाला. अजूनही ही मालिका सुरूच आहे. या पार्श्वभूमीवर माथाडी कामगार व अन्य घटकांसाठी पॅकेज जाहीर करावे. कामाच्या ठिकाणी ये-जा करण्यासाठी त्यांना रेल्वे व बसमधून प्रवासाला परवानगी द्यावी.

'पोक्सो' : गुन्हेगारांना भीती तर नागरिकांच्या पाल्यांना कवच, जाणून घ्या सामान्य माहिती

तसेच त्यांना विमा संरक्षणाबरोबरच मृताच्या कुटुंबीयांना मदत करावी आदी मागण्या महाराष्ट्र राज्य माथाडी ट्रान्सपोर्ट आणि जनरल कामगार युनियनने शासनासमोर ठेवून विविध आंदोलनाव्दारे त्याचा पाठपुरावा सुरू ठेवला आहे. आज माथाडी नेते नरेंद्र पाटील यांच्या नेतृत्वाखाली माथाडी कामगारांनी मुंबईत मध्य, हार्बर व पश्चिम रेल्वेच्या मस्जिद बंदर, डाक यार्ड रोड, रे रोड, कुर्ला, मानखुर्द, वाशी, सानपाडा, तुर्भे, कोपरखैरणे, घणसोली, ऐरोली, दादर, भांडूप, मुलुंड, ठाणे, डोंबिवली कल्याण, उल्हासनगर, मुंबई सेंट्रल, बांद्रा, अंधेरी, बोरीवली, दहिसर, डहाणू आदी रेल्वे स्थानकाबाहेर कोरोनाची नियमावली आणि कायदा व सुव्यवस्थेचे पालन करीत स्थानक प्रबंधकांना निवेदन सादर करून कामगार व महाराष्ट्र दिन साजरा केला.

Edited By : Balkrishna Madhale