फलटण शहर (सातारा) : आगामी काळामध्ये फलटण तालुक्यात शिवसेना वाढीसाठी व पक्ष संघटन बळकट करण्यासाठी मी स्वतः प्रयत्नशील राहणार आहे. जनतेची कामे करण्यासाठी शिवसेनेच्या कार्यकर्त्यांना पूर्ण ताकद देणार असल्याचे प्रतिपादन गृह राज्यमंत्री शंभूराज देसाई यांनी केले.

येथे खासगी दौऱ्यानिमित्ताने आलेल्या मंत्री देसाई यांनी येथील शासकीय विश्राम गृहामध्ये शिवसेनेच्या पदाधिकाऱ्यांशी व शिवसैनिकांशी संवाद साधला. त्या वेळी ते बोलत होते. देसाई म्हणाले, ‘‘फलटण तालुक्यामधील शिवसैनिकांची कामे करण्यासाठी व शिवसैनिकांच्या माध्यमातून सर्वसामान्य जनतेची कामे करण्यासाठी शिवसेना कटिबद्ध आहे. आगामी काळामध्ये फलटण तालुक्यामधील शिवसेनेचे पक्षसंघटन मजबूत करण्यासाठी मी स्वतः प्रयत्नशील राहणार आहे. तालुक्यामध्ये शिवसेना बळकट करण्यासाठी आगामी महिन्यामध्ये मी स्वतः फलटणचा दौरा करून शिवसेनेच्या विविध शाखांचे उद्‍घाटन करणार आहे. सर्वसामान्य शिवसैनिकांना पूर्ण ताकद देणार आहे.’’

राज्यामध्ये महाविकास आघाडीचे सरकार स्थापन होऊन उद्धव ठाकरे हे मुख्यमंत्री झाले. त्यामुळे राज्यातील सर्वच शिवसैनिकांमध्ये नवचैतन्य निर्माण झाले आहे. राज्यावर कोरोना, चक्रीवादळ आणि आता महापूर अशी लागोपाठ संकटे आली आहेत. अशा परिस्थितीमध्ये सरकार सर्व संकटांना तोंड देत आहे. महाविकास आघाडी सरकारच्या माध्यमातून राज्यामध्ये विविध कामे प्रगतिपथावर सुरू आहेत. सध्या उद्‍भवलेल्या पूर परिस्थितीमधील नागरिकांच्या पाठीशी सरकार ठामपणे उभे आहे, असेही मंत्री देसाई यांनी स्पष्ट केले.