भिलार (सातारा) : स्व. बाळासाहेब भिलारे (Balasaheb Bhilare) यांची प्रशासनावरील मजबूत पकड ही विकासाला पूरक अशी होती. जिल्हा परिषदच्या (Zilla Parishad) माध्यमातून डोंगरी विभागात रस्त्यांचे जाळे विणणारा आणि विकासासाठी नेहमी झगडणारा नेता आमच्यातून गेला असल्याचे प्रतिपादन गृह राज्यमंत्री शंभूराज देसाई (Minister Shambhuraj Desai) यांनी केले. स्व. बाळासाहेब भिलारे यांना आदरांजली वाहण्यासाठी भिलार येथे मंत्री देसाई हे आले असता, त्यांनी आपल्या भावना व्यक्त केल्या.

यावेळी माजी आमदार सदाशिव सपकाळ, माजी जिल्हा परिषद उपाध्यक्ष नितीन भरगुडे-पाटील, सभापती संजूबाबा गायकवाड, यशवंत घाडगे, बंडा कुंभारदरे, वाई उपविभागीय पोलिस अधिकारी खराडे-पाटील, राजू अबा भिलारे, प्रवीण भिलारे, जतीन भिलारे, नितीन भिलारे, सुधीर भिलारे, अमित भिलारे, अजित कासुर्डे, नितीन भिलारे आदी उपस्थित होते.

देसाई पुढे म्हणाले, १९९२ सालच्या जिल्हा परिषद टीममध्ये आम्ही सर्वजण एकत्र होतो. सगळ्यांना बरोबर घेवून जिल्ह्यात प्रभावीपणे काम करणारे दादा लोकसंग्रही नेते म्हणूनही परिचित होते. त्यांच्या जाण्याने महाबळेश्वर तालुक्याची अपरिमित, अशी हानी झाल्याचे त्यांनी सांगितले. आम्ही जरी वेगळ्या पक्षातून निवडून आलो असलो, तरी दादांनी दिलेल्या अभ्यासपूर्ण यादीवरच आम्ही अगदी विश्वासाने विकास निधी टाकत होतो. हा त्यांच्या आश्वासक कामाचा विचार असल्याचे माजी आमदार सदाशिव सपकाळ यांनी दादांच्या आठवणी जगावताना सांगितले.