पाटण : कोयना धरण (Koyna Dam) पाणलोट क्षेत्रात पावसाचा जोर वाढला आहे. पूर्व भागातही पावसाच्या सरी येऊ लागल्या होत्या. त्यामुळे खरीप पिकांच्या (Kharif crop) आंतर मशागतीच्या कामात आज अडथळा निर्माण झाला आहे.

पावसाचा (Rain Update) वाढलेला जोर पश्चिम भागातील भात व नाचणी पुनर्लागणीच्या कामासाठी उपयुक्त असल्याने शेतकरी वर्गात समाधानाचे वातावरण आहे. काल सकाळपासून पावसाचा जोर वाढला आहे.

गेल्या २४ तासांत कोयनानगर येथे सर्वात जास्त ४९ मिलिमीटर पावसाची नोंद झाली आहे. नवजाला ४४ मिलिमीटर आणि महाबळेश्वरला ३१ मिलिमीटर पावसाची नोंद झाली असून, धरणाची पाणीपातळी २०६५.०४ फूट झाली आहे.

पावसाचा जोर वाढल्याने जलाशयात होणारी पाण्याची आवक वाढली असून, प्रतिसेकंद चार हजार ९०१ क्युसेक होत आहे. जलाशयाचा एकूण पाणीसाठा २४.४६ टीएमसी झाला आहे.