कोरेगाव (सातारा) : कोरेगांव विधानसभा मतदारसंघातील (Koregaon Assembly constituency) विद्यमान आमदारांनी स्वकर्तृत्वावर कामे मंजूर न करता आमदार शशिकांत शिंदे (MLA Shashikant Shinde) यांनी प्रयत्न करुन मंजूर केलेल्या कामांची उद्घाटने, भूमीपूजने व कृतज्ञता सोहळे घेण्यातच धन्यता मानलीय. नुकतेच जिहे-कठापूर योजनेचेही (Jihe-Kathapur scheme) श्रेय घेण्याचा प्रयत्न केला. त्यांनी पोपटपंची करुन दुसऱ्याच्या कामाचे श्रेय घेण्याचा प्रयत्न करु नये. खटाव तालुक्यातील जनता त्यांच्या या भूलथापांना बळी पडणारी नाही, असा टोला प्रदीप गोडसे, डॉ. महेश पवार, अरुण वाघ यांनी आमदार महेश शिंदे (MLA Mahesh Shinde) यांना लगावला.

महेश शिंदे यांनी आमदार शशीकांत शिंदेंवर केलेल्या टीकेला खटाव तालुक्यातील राष्ट्रवादीच्या (NCP) कार्यकर्त्यांनी प्रतिउत्तर दिले आहे. यासंदर्भात प्रदीप गोडसे, डॉ. महेश पवार, अरुण वाघ यांनी म्हटले, की खटाव तालुक्यातील मोळ म्हस्कोबा मंदिर वस्ती मोळ रस्ता दोन कोटी ४२ लाख, तसेच गारवडी ते पशुचामळा डिस्कळ रस्ता ७१.१० लाख, रा. मा. १४१ ते लांबी १.०२० किमी ७४.३६ लाख अशी एकूण तीन कोटी ८७ लाखांच्या कामांची मागणी आमदार शशिकांत शिंदे यांनी १४ ऑगस्ट २०१८ मध्ये केली होती. या प्रस्तावित कामांना मुख्यमंत्री ग्रामसडक योजना २०१९-२० मधून मान्यता मिळण्यासाठी प्रस्ताव सादर केला होता. या कामांना सात जून २०१९ रोजी प्रशासकीय मान्यता देण्यात आली होती. त्यावेळी त्यांच्या आमदारकीचा जन्म सुध्दा झाला नव्हता.

खटाव तालुक्यामध्ये आमदार शशिकांत शिंदे यांनी कोट्यवधींची विकासकामे केली आहेत. विद्यमान आमदारांनी गेल्या दोन वर्षांपासून मुख्यमंत्री ग्रामसडक योजनेतील उर्वरित कामे का मंजूर केली नाहीत, असा प्रश्न करून त्यांनी पोपटपंची करुन दुसऱ्याच्या कामाचे श्रेय घेण्याचा प्रयत्न करु नये. खटाव तालुक्यातील जनता त्यांच्या या भूलथापांना बळी पडणारी नाही. लवकरच आमदार शशिकांत शिंदेंच्या हस्ते या रस्त्यांच्या कामांचे भूमीपूजन करण्यात येणार आहे, असेही त्यांनी सांगितले.