सातारा (कऱ्हाड) ः आटपाडी आगाराच्या आटपाडी-कऱ्हाड एसटी बसवर आज दुपारी सुर्ली घाटात (ता. कऱ्हाड) घाटात अज्ञाताने आज मंगळवारी दुपारी दगडफेक केली. त्यामुळे एसटीच्या काचा फुटल्या आहेत. त्यामुळे कर्मचाऱ्यांच्या संपाला पहिल्यांदाच गालबोट लागले आहे.

एसटी कर्मचाऱ्यांच्या संप सुरु आहे. त्यामुळे कऱ्हाडसह अनेक एसटी आगारातील बस बंद आहेत. मात्र संप सुरु असतानाही सांगली जिल्ह्यातील बहुतांश चालक वाहक कामावर हजर झाल्याने सांगली जिल्ह्यांतर्गत बहुतांश आगारातील एसटीबस सुरु झाल्या आहेत. आज मंगळवारी दुपारी एसटीच्या आटपाडी आगारातून निघालेल्या आटपाडी-कऱ्हाड बसवर (एमएच -14- बीटी- 3695) कडेगाव येथून पुढे आल्यानंतर असलेल्या सुर्ली घाटात दगडफेक झाली.

बस कऱ्हाडकडे येत असताना पाठिमागून दगडफेक केली असल्याची माहिती वाहक अमोल वाघमारे यांनी माहिती दिली. दगडफेकीत कोणत्याही प्रवाशास दुखापत झालेली नाही. मात्र एसटीच्या काचा फुटल्या आहेत. त्यामुळे एसटी कर्मचाऱ्यांचा संपाला गालबोट लागले आहे. दरम्यान कऱ्हाड तालुका पोलिस ठाण्यात अज्ञातावर गुन्हा दाखल करण्याचे काम सुरु असल्याचे पोलिसांनी सांगीतले.