रेठरे बुद्रुक (जि. सातारा) : रेठरे खुर्द येथे आज दुपारी मैत्रिणीकडे अभ्यासासाठी निघालेल्या विद्यार्थिनीवर काळाने घाला घातला. उसाच्या वाड्यांची वाहतूक करत असलेल्या ट्रॅक्‍टरने वेगाने येऊन धडक दिल्याने ती जागीच ठार झाली. ही घटना समजल्यानंतर परिसरासह गाव हादरला. नम्रता आकाराम मोहिते (वय 14) असे अपघातात ठार झालेल्या मुलीचे नाव आहे. अपघात घडल्यानंतर वाहनचालक मोहन गणपती घोडके यांच्यावर पोलिसांनी गुन्हा नोंद केला आहे. या घटनेची कऱ्हाड ग्रामीण पोलिसात नोंद झाली आहे. 

रेठरे बुद्रुक ते वाठार मार्गावर रेठरे खुर्द येथील श्री बिरोबा मंदिरासमोर हा अपघात घडला. दुपारी तीन वाजता नम्रता मैत्रिणीच्या घरी अभ्यासासाठी निघाली होती. त्याचवेळेस तिच्या पाठीमागून वाठारच्या दिशेने उसाच्या वाड्याने भरलेला ट्रॅक्‍टर (एमएच 10 एच 1436) वेगाने आला. काही कळायच्या आतच ट्रॅक्‍टरने तिला जोराची धडक दिली. धडक इतकी जोरात होती, की ती जागीच ठार झाली. 

दहिवडीत अंधश्रद्धेतून मुलीचा बळी?; माण तालुक्यातील दोन देवऋषींना पोलिस कोठडी

घटनेनंतर ट्रॅक्‍टर विजेच्या खांबावर जाऊन धडकल्याने खांब पूर्णतः मोडला. गावातील वीज प्रवाह खंडित झाला. नम्रता ही जाई मोहिते प्रशालेत इयत्ता आठवीत शिकत होती. शांत स्वभाव असल्याने ती सर्वांची आवडती होती. तिचे वडील आकाराम मोहिते कऱ्हाड येथील जिल्हा परिषद बांधकाम विभागातील सेवानिवृत्त कर्मचारी आहेत. तिच्यावर काळाने घाला घातल्याने परिसरावर शोककळा पसरली आहे. तिच्या मागे आई, वडील, चुलते, भाऊ, भावजय असा परिवार आहे. पोलिस उपनिरीक्षक अशोक भापकर तपास करत आहेत. 

संपादन : बाळकृष्ण मधाळे