सातारा : फेसबुक, व्हॉटसऍपव्दारे प्रेमाच्या जाळ्यात ओढत साताऱ्यातील एकास लुटल्याप्रकरणी दाखल असणाऱ्या गुन्ह्यात सातारा तालुका पोलिसांनी एका युवतीसह बारामती तालुक्‍यातील करावागज येथील तिघांना आज अटक केली. 

समाजमाध्यमातून प्रेमाच्या जाळ्यात ओढत लुटमारीचे प्रकार पुणे जिल्ह्यात घडले होते. अशाच पध्दतीने डिसेंबर महिन्यात साताऱ्यातील एकास ठोसेघर परिसरात बोलावून लुटण्यात आले होते. याची माहिती मिळाल्यानंतर पोलिस अधीक्षक अजयकुमार बन्सल यांनी तपासाच्या सुचना सातारा तालुका पोलिस ठाण्याचे निरीक्षक सजन हंकारे यांना दिल्या होत्या. त्यांनी उपनिरीक्षक अमित पाटील, हवालदार दादा परिहार, सुजीत भोसले, सागर निकम, सतीश पवार, नितीराज थोरात, राजेंद्र वंजारी, मालोजी चव्हाण, विश्‍वनाथ आंब्राळे यांना तपासाच्या सूचना दिल्या होत्या. या पथकाने पुणे तसेच बारामती परिसरात या टोळीचा शोध घेण्याचे काम सुरु केले. शोधादरम्यान त्यांनी बारामती (जि.पुणे) येथील करावागज गावातून वैभव प्रकाश नाळे (वय 28) आणि अजिंक्‍य रावसाहेब नाळे (वय 23) या दोघांना ताब्यात घेतले. 

हे पण वाचा- बोंबला! इंदोलीतील लग्नासाठी कोरेगाव तालुक्यातून एकजण आला अन् चारजणांना सोबत घेऊन पॉझिटीव्ह झाला

चौकशीत त्यांनी सातारा तालुक्‍यातील ठोसेघर येथे गतवर्षीच्या डिसेंबर महिन्यात एकास बोलावून त्याच्याकडील सोने, चारचाकी, रोकड सुटल्याचे तसेच त्याचे फोटो व व्हिडिओ काढून ते व्हायरल करण्याची धमकी देत मारहाण केल्याची कबुली दिली. चौकशीत त्यांनी महिला साथीदाराचे नाव सांगितले. यानुसार पोलिसांनी हवेली (जि.पुणे) येथील थेउर परिसरातून 28 वर्षीय युवतीस ताब्यात घेतले. चौकशीत त्यांनी फेसबुक, व्हॉटसऍपवर ओळख काढत त्यानंतर प्रेमाच्या जाळ्यात ओढून बारामती परिसरातील अनेकांना लुटल्याची कबुली दिली आहे. कारवाईत सहभागी झालेल्यांचे पोलिस अधीक्षक अजयकुमार बन्सल, अतिरिक्‍त पोलिस अधीक्षक धीरज पाटील, सहाय्यक अधीक्षक आंचल दलाल यांनी अभिनंदन केले आहे.  

साताऱ्याच्या बातम्या वाचण्यासाठी येथे ► क्लिक करा

संपादन : बाळकृष्ण मधाळे