गोंदवले,(जि.सातारा) : दुकाने उघडायला परवानगी मिळाली खरी, पण मंदिर बंद असल्यामुळे ग्राहकच नाहीत. त्यामुळे उघड दार देवा आता अशीच भावना मंदिर परिसरातील दुकानदारांकडून व्यक्त होत आहे. गोंदवल्यातील समाधी मंदिर परिसरातील दुकाने अद्यापही बंदच असल्याने व्यापारी अडचणीत आले आहेत.
 
कोरोना विषाणूंचा प्रादुर्भाव रोखण्यासाठी मार्च महिन्यात पहिल्यांदा लॉकडाउन करण्यात आला. त्यानंतरही कोरोनाबधितांची संख्या वाढतच राहिल्याने सलग अडीच महिने हा लॉकडाउन सुरूच राहिला. याकाळात जनजीवन विस्कळित झालेच; शिवाय व्यापारपेठा ठप्प झाल्याने आर्थिक गणित कोलमडले. धार्मिक स्थळे बंद झाल्याने त्या परिसरातील दुकानेही बंदच राहिली.
 
गोंदवले बुद्रुक येथील श्री ब्रह्मचैतन्य महाराज समाधी मंदिरही अडीच महिन्यांपासून बंदच आहे. परिणामी मंदिर परिसरातील प्रासादिक, खेळणी, फोटोफ्रेम, स्टेशनरी अशी मिळून सुमारे दीडशे दुकाने बंदच आहेत. प्रशासनाने काही अटी घालून बाजारपेठा सुरू करण्याचा निर्णय जाहीर केल्यावर इतर दुकाने सुरू झाली. परंतु, गोंदवल्यातील मंदिर परिसरातील दुकाने मात्र अद्यापही बंदच आहेत.
 
समाधी मंदिर अद्याप बंद आहे. याशिवाय दळणवळण देखील सुरू झालेले नाही. त्यामुळे समाधी दर्शनासाठी येणाऱ्या भाविकांसाठी मर्यादा पडल्या आहेत. विशेषतः पुणे, मुंबई, सांगली, नगर या भागातून येथे मोठ्या प्रमाणात भाविक येत असतात. मात्र, कोरोना प्रादुर्भावाच्या पार्श्वभूमीवर हे भाविक आपापल्या गावी अडकून पडले आहेत. समाधी मंदिरात नित्य उपासना सुरू आहे. परंतु, बाहेरून येणाऱ्या भाविकांना अद्याप प्रवेश नसल्याने हा परिसर सुना सुना पडला आहे. याचाच परिणाम मंदिर परिसरातील दुकानांवरही झाला आहे. समाधी दर्शनासाठी भाविक नसल्याने दुकानाला ग्राहक नसल्याचे चित्र आहे. 

लॉकडाउन शिथिल होऊन बाजारपेठा सुरू झाल्या असल्या तरी समाधी मंदिर बंद असल्याने ग्राहक नाहीत. या संकटातून श्री महाराजांनीच आता मार्ग दाखवावा, अशा भावना व्यावसायिक राजेंद्र कट्टे यांनी व्यक्त केल्या.

CoronaUpdate : खराडे, शिंदेवाडी, शेणोली स्टेशन, डुईचीवाडी, कुसबुद्रुक, निढळ, कारंडवाडीतील आढळले बाधित

देशाला पूरक अर्थसंकल्पाची आवश्यकता : पृथ्वीराज चव्हाण