महाबळेश्वर : प्रतापगड भागामध्ये तब्बल 12 फूट लांबीचा अजगर जखमी अवस्थेत आढळून आला. वन विभागाने प्राणिमित्रांच्या सहकार्याने या अजगरास पकडले. अजगरावर उपचार करणार असून, त्याला पुन्हा जंगलामध्ये सोडण्यात येणार असल्याची माहिती वन विभागाच्या वतीने देण्यात आली.
 
वनक्षेत्रपाल महेश झांजुर्णे यांच्या मार्गदर्शनाखाली वन विभागाने या परिसराला भेट देऊन पाहणी केली. जंगलामध्ये जखमी अवस्थेत अजगर आढळून आला. या अजगराच्या पाठीवर जखमा झाल्या होत्या. वनरक्षक रोहित लोहार, आशिष पाटील, लहू राऊत, दीपक सोरट, महादेव कट्टे, वनमजूर वागदरे, तसेच सह्याद्री प्रोटेक्‍टर्सचे संदेश भिसे, शुभम टेके आदींनी या अजगारास पकडले व सुरक्षितरित्या हिरडा विश्रामगृह येथे उपचारांसाठी आणण्यात आले. पशुवैद्यकीय अधिकारी डॉ. जयसिंग सिसोदिया, डॉ. संदीप आरडे यांनी त्याच्यावर उपचार केले. 

अजगराची लांबी तब्बल बारा फूट आहे. मादी जातीचे या अजगराचे वजन चाळीस किलोहून अधिक असून, अंदाजे सात ते आठ वर्षे वय आहे. त्याच्यावर उपचार करून पुन्हा जंगलामध्ये सोडून देण्यात येणार असल्याची माहिती वन विभागाने दिली.

दहावीनंतर काय? विनामुल्य वेबिनारचे आयोजन