विंग (जि. सातारा) : येथून जवळच शिंदेवाडी परिसरात बिबट्याने अक्षरशः दहशत निर्माण केली आहे. तेथील भरवस्तीत घुसून त्याने हल्ला चढवत एका पाळीव कुत्र्यास ठार मारून त्यास झाडावर लटकवले. परवा रात्री घडलेला या प्रकारामुळे ग्रामस्थांत भीतीचे वातावरण त्यामुळे आहे.

शिंदेवाडी परिसरात बिबट्याचा वावर नित्याचा बनला आहे. तेथील विविध परिसरात त्याच्याकडून हल्ल्याचे सत्र सुरूच आहे. विशेषतः पाळीव प्राण्यांना त्याने लक्ष केले आहे. भरवस्तीत घुसण्यापर्यंत त्याची मजल गेली आहे. परवा रात्री एका पाळीव कुत्र्यास त्याने ठार मारले. तेथील शिवाजी दादू शिंदे या शेतकऱ्याचे कुत्रे होते. ही शिकार बिबट्याने अक्षरशः झाडावर नेऊन लटकवली होती. परवा रात्री घडलेला प्रकार ग्रामस्थांच्या काल निदर्शनास आल्यानंतर घबराहटीचे वातावरण निर्माण झाले आहे. तत्पूर्वी त्या वस्तीत बिबट्याने पाळीव प्राण्यावर अनेकदा हल्ले चढवले आहेत.

महाबळेश्वर : वनसदृश्य मिळकतींची माहिती संकेतस्थळावर उपलब्ध; आक्षेपासाठी कागदपत्र दाखल करा!  

दोन वर्षांपूर्वी तेथील एका शेतकऱ्याच्या चार शेळ्या ठार त्याने केल्या होत्या. त्यानंतर अलीकडे त्या गावठाण परिसरातील शेतकऱ्यांना बिबट्याने दर्शन नेहमीच घडत होते. पैलवान तानाजी शिंदे, उत्तम शिंदे यांनी त्यास ठिकठिकाणी पाहिले होते. त्यानंतर परवा रात्री शिकारीचा डाव त्याने साधला. एका पाळीव कुत्र्यास ठार मारले. गंजीवर ते झोपलेले होते. हल्ल्यानंतर त्यास फरफडत नेऊन एका जांभळीच्या झाडावर नेऊन लटकवले. घटनास्थळावर झाडाच्या खोडावर त्याच्या पायाच्या नख्या ओरखडल्याचे दिसत आहे. संबंधितांनी शोध घेतल्यानंतर काल हा प्रकार निदर्शनास आला. त्यामुळे घबराहट निर्माण झाली आहे. त्यानंतर या घटनेची माहिती वनविभागाला देण्यात आली. ग्रामस्थांनी बंदोबस्ताची आग्रही मागणी आता केली आहे. 

संपादन : बाळकृष्ण मधाळे