कऱ्हाड (जि. सातारा) ः कोयना- कृष्णा नद्यांचे पाणी वाढत महापुराच्या दिशेने जाते. तसतशी त्या दोन्ही नदी काठावरील शहरी भागातील कुटुंबांतील अस्वस्थता वाढते. शहरातील तब्बल 222 पेक्षाही जास्त कुटुंबांचे स्थलांतर अर्धवट स्थितीत आहे. 13 वर्षांपेक्षाही जास्त काळ झाला, तरी अद्यापही हा प्रश्न सुटलेला नाही. पालिकेने काहींचे स्थलांतर केले आहे. मात्र, तेही स्थलांतर अर्धवटच स्थितीत आहे. 

संततधार पाऊस व कोयना धरणातून नदीत पाणी सोडले, की शहरात पूरस्थिती निर्माण होते. त्यामुळे पालिकेच्या मदतीने आजअखेर विविध ठिकाणची सुमारे 222 हून अधिक कुटुंबांचे नेहमीच स्थलांतर होते. मागील वर्षी तितकीच कुटुंबे सुरक्षित स्थळी स्थलांतरित केली होती. त्यांच्या कुटुंबांची राहण्याची व्यवस्था पालिकेच्या शाळांच्या इमारतीसह कृष्णाबाई मंगल कार्यालय व पालकर शाळेत केली जाते. मागील वर्षी सुमारे 790 हून अधिक लोकांचे स्थलांतर झाले होते. पूरस्थितीत पालिका मदत करते. मात्र, प्रत्येक वर्षी पावसाळ्यात नदीकाठावरील नागरिक पुराची भीती डोक्‍यावर घेऊन जगतात. त्या कुटुंबांची भीती संपणार तरी कधी, हाच खरा प्रश्न आहे. घरकाम करणाऱ्या गवंडी कामासह रोजंदारीवरील काम करणाऱ्यांचे वास्तव्य त्या वस्तीत आहे. 

प्रत्येक वर्षी पूर आला, की धावपळ उडते. 13 वर्षांपासून याच स्थितीशी हे लोक सामना करत आहेत. त्या वेळी पालिकेने घरकुलासाठी अर्ज भरून घेतले होते. त्याबाबत काहीही निर्णय नाही. काही कुटुंबांना बारा डबरे परिसरात खोल्या बांधून दिल्या. मात्र, कुटुंब मोठे तर खोल्या लहान झाल्या आहेत. त्यामुळे हे स्थलांतरही अपुरे ठरते आहे. तिथे राहण्यास गेलेल्यांमध्ये दोन ते चार मुले आहेत, त्यांनी काय करायचे अशा प्रश्न आहे. घरातील आई- वडिलांनी कुणासोबत राहायचे हाच प्रश्न आहे. त्यामुळे तेथील दहा बाय दहाच्या खोल्यांची जागा पुरणार नसल्याने स्थलांतरित होणाऱ्या पैकी कोणीही तिकडे गेले नाही. 

(संपादन ः संजय साळुंखे) 
 

या गावात हॉस्पिटलसमोरच कोरोना बाधिताचा तडफडत मृत्यू