सातारा : कोरोना विषाणूचा प्रादुर्भाव रोखण्याच्या अनुषंगाने काळूबाई देवी (ता. वाई) व दावजी बुवा यात्रा सुरुर या दोन्ही यात्रा आयोजित करण्यास मनाई करण्यात आली आहे. या यात्रांनिमित्त जिल्हा दंडाधिकारी शेखर सिंह यांनी 16 जानेवारी ते 14 फेब्रुवारी या कालावधीत 144 कलम लागू करण्याचे आदेश दिले आहेत.

या आदेशानुसार, काळूबाई देवी यात्रा, मांढरदेव (ता. वाई) व दावजी बुवा यात्रा सुरुर या दोन्ही यात्रा आयोजित करण्यास सक्त मनाई करण्यात आली आहे. तसेच कोणत्याही प्रकारे गर्दी आकर्षित होणार नाही, अशा धार्मिक, सांस्कृतिक कार्यक्रमाचे अथवा मिरवणुकांचे आयोजन करण्यात येऊ नये. यात्रेतील धार्मिक कार्यक्रम मंदिराचे पुजारी व ट्रस्टचे सदस्य यांनीच पार पाडावी. त्या व्यतिरिक्त इतर व्यक्तींना कार्यक्रमास उपस्थित राहण्यास मनाई असेल, तसेच यात्रा कालावधीत ट्रस्टी व पुजारी वगळून इतर व्यक्तींना दर्शनासाठी बंदी असेल.

राजू शेट्टी, सदाभाऊंची तब्बल 47 गुन्ह्यातून निर्दोष मुक्तता; कऱ्हाड न्यायालयाचा निकाल

यात्रा कालावधीत भाविकांना, तसेच स्थानिकांना रहिवासासाठी तंबू उभारण्यास व पशू व पक्षी यांचा बळी देण्यास मनाई करण्यात आली आहे. 16 जानेवारी ते 14 फेब्रुवारी या कालावधीत वाई ताकुक्यातील मौजे मांढरदेव गावासह मांढरदेव गावापासून 10 किलोमीटर परिसर, मौजे परखंदी, डुईचीवाडी, पिराचीवाडी, बालेघर, सुलतानपूर, लोहारे, वेरुळी, मुंगसेवाडी, सटालेवाडी, एमआयडीसी वाई, शहबाग, अंबाडे खिंड, बोपर्डी, धावडी फाटा रेणुसेवस्ती, गुंडेवाडी, कोचळेवाडी, काळुबाई मंदिर जमादाडे वस्ती शेजारी वाई, वाई शहर व सुरुर, तसेच खंडाळा तालुक्यातील कर्नवडी, झगलवाडी, अतिट व लिंबाचीवाडी येथील सार्वजनिक ठिकाणी अगर रस्त्यावर मोठ्या संख्येने एकत्र येणे अथवा गर्दी करण्यासही मनाई करण्यात आली आहे.

महान पुरुषामागे एक स्त्री असते, पण ती पत्नीच असते असं नाही; श्रीनिवास पाटलांच्या वक्तव्याने गाेंधळ