सातारा : सिमेंट आणि स्टील उत्पादक कंपन्यांनी मनमानी करत दर वाढल्याने बांधकाम क्षेत्र अडचणीत आल्याचा आरोप करत येथे बिल्डर असोसिएशन ऑफ इंडियाच्या सातारा शाखेच्या वतीने जिल्हाधिकारी कार्यालयासमोर आंदोलन करण्यात आले. याबाबतचे निवेदन आंदोलकांनी जिल्हाधिकाऱ्यांना दिले असून, यात सिमेंट, स्टील दरवाढीची उच्चस्तरीय चौकशी करण्याची मागणी करण्यात आली आहे. 

या आंदोलनात सातारा शाखेचे अध्यक्ष श्रीराज दीक्षित, राजेश देशमुख, विजयसिंह जगदाळे, अशोक शिंदे, सचिन देशमुख, संदीप जाधव, ओमकार शिंदे, सागर निंबाळकर, किशोर लोखंडे व इतर पदाधिकारी सहभागी झाले होते. निवेदनात म्हटले आहे, की देशात उत्पादित होणारे 55 टक्के सिमेंट बांधकाम क्षेत्रासाठी, तर त्यापेक्षाही जास्त लोखंड वापरण्यात येते. गेल्या काही दिवसांपासून या दोन्ही वस्तूंची भाव वाढ होत आहे. या भाववाढीमुळे करारानुसारची बांधकामे पूर्ण करणे व्यावसायिकांना अशक्‍य झाले आहे. 

JEE MAIN परीक्षा देताय?, मग आधी ही मार्गदर्शक तत्त्वे वाचा; म्हणजे, तुम्हाला सहज प्रवेश मिळेल!

दरवाढीमुळे सर्वसामान्यांच्या स्वस्तातील घराची संकल्पना मातीत मिळाली आहे. कोरोना व इतर कारणांमुळे अडचणीत आलेले बांधकाम क्षेत्र तेजीत येत असतानाच त्याला दरवाढीचा फटका बसला असून, परिणामी रोजंदारीवरील कामगारांच्या हाताला काम मिळणे दुरापास्त झाले आहे. आगामी काळात बांधकाम व्यवसाय आणखी अडचणीत येऊ नये, यासाठी सरकारने सिमेंट, स्टील नियंत्रण प्राधिकरण निर्माण करण्याची गरज असून, झालेल्या दरवाढीची उच्चस्तरीय चौकशी करण्याची मागणीही आंदोलक बांधकाम व्यावसायिकांनी निवेदनात केली आहे. 

साताऱ्याच्या बातम्या वाचण्यासाठी येथे ► क्लिक करा

संपादन : बाळकृष्ण मधाळे