उंब्रज (जि. सातारा) : परिसरातील ग्रामीण भागामध्ये अवैध दारूधंदे सुरू असून, अवैध दारूधंद्यांवर पोलिसांची कारवाई दुर्मिळ झाली आहे. अवैध दारूधंदेवाले मोकाट झाले असल्याचे चित्र सद्य:स्थितीत दिसून येत आहे. स्थानिक गुन्हे अन्वेषण विभागाकडून याकडे जाणूनबुजून दुर्लक्ष केले जात आहे, तर स्थानिक पोलिस प्रशासन वेळप्रसंगी चिरीमिरी कारवाईचा बडगा उगारत कारवाईचा "फार्स' करत आहेत.
उंब्रजसह परिसरातील गावांत अवैध दारू चोरुन विकली जात आहे. त्यावर संबंधित विभागाचा जरब कमी झाल्याचे जाणवते आहे. पोलिसांनी केलेल्या किरकोळ कारवाईने परिसरातील गावांत अवैध दारूविक्री सुरू असल्याचे उघड होत आहे. तर संबंधित विभाग अवैध धंद्यांविरोधात कारवाई करणार का? असा सवाल नागरिकांतून उपस्थित केला जात आहे. अनेक ठिकाणी उघड्यावर हे धंदे सुरू असून, देशी दारूच्या बाटल्या या उंब्रज परिसरातून दुचाकीसह चारचाकी वाहनांतून पोच केल्या जातात. गेल्या काही वर्षांपासून चरेगाव येथील अवैध दारूचा गुत्ता बेफामपणे सुरू असून, याचा नाहक त्रास नागरिकांसह परिसरातील रहिवाशांना होत आहे.
काही दिवसांपूर्वी या गुत्त्यावर स्थानिक गुन्हे अन्वेषण विभागाकडून कारवाई करण्यात आली. यामध्ये दारूविक्री करणाऱ्या महिलेवर गुन्हा दाखल करण्यात आला. काही वर्षांपूर्वी चरेगाव (ता. कऱ्हाड) येथील एका बिअरबार विरोधात "उभी बाटली आडवी' करून दारूबंदी करण्यात आली होती. परंतु, त्याला न जुमानता त्याच बंद बिअरबारच्या आडोशाला गेली कित्येक वर्षे अवैध दारूविक्री सुरू आहे. याची खबर स्थानिक गुन्हे अन्वेषण विभागाला पोच होते. परंतु, चरेगाव बीट अंमलदारास याबाबत काहीच माहिती नसल्याने आश्चर्य व्यक्त केले जात आहे. आर्थिक हितसंबंधांमुळे या अवैध दारूविक्रीकडे डोळेझाक केल्याची चर्चा येथील नागरिकांतून सुरू आहे.
आशीर्वाद कोणाचे?
लॉकडाउनच्या काळात बंद असणारे अवैध दारूअड्डे अचानक तेजीत सुरू झाले असून, ते नेमके कोणाच्या आशीर्वादाने सुरू झाले आहेत? याचा शोध घेण्याची आवश्यकता आहे. स्थानिक गुन्हे अन्वेषण विभागाचे अशा अवैध दारूविक्रीवाल्यांवर वरदहस्त असून, वर्षातून केवळ एक ते दोन कारवाया करून पाठीवर कौतुकाची थाप मारून घेत असल्याची चर्चा नागरिकांतून बोलली जात आहे. पोलिस यंत्रणा व स्थानिक गुन्हे अन्वेषण विभागाकडून परिसरातील दारूधंद्यावर दिखाऊपणा करीत कारवाई केल्याचा आव आणत आहेत. तर आर्थिक तडजोड करीत याकडे पाठच फिरवली असल्याचे दिसून येत असल्याची चर्चा परिसरात सुरू आहे.
संपादन : बाळकृष्ण मधाळे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.