उंब्रज (जि. सातारा) : भागातील वडगाव येथील वनविभागाच्या खाणीत काल रात्री ९ वाजण्याच्या सुमारास बिबट्याचा मृतदेह आढळला. तो पूर्ण कुजलेल्या अवस्थेत असून बिबट्याचा मृत्यू नैसर्गिकरित्या झाला आहे. किमान महिन्यांपूर्वी त्या बिबट्याचा मृत्यू झाला असावा, असा प्राथमिक अंदाज व्यक्त करण्यात येत आहे. 

याबाबत अधिक माहिती अशी,  वडगाव (उंब्रज) गावाच्या हद्दीतील एका खाणीपासून आतमध्ये वनविभागाच्या हद्दीत बिबट्याचा मृतदेह कुजलेल्या अवस्थेत असल्याची माहिती स्थानिक नागरिकांना मिळाली. यावेळी त्यांनी ती माहिती वनविभागाला कळवली. त्यानंतर वनविभागाचे वनक्षेत्रपाल अर्जुन गमरे, वनरक्षक दीपाली अवघडे, राहुल रणदिवे, रमेश जाधवर, पर्यावरण अभ्यासक रोहन भाटे यांनी घटनास्थळी धाव घेतली.

कऱ्हाड तालुक्‍यातील सर्वात मोठ्या उंब्रज ग्रामपंचायतीत महाविकास-भाजपमध्ये कांटे की टक्कर?

दरम्यान, वनविभागाच्या कर्मचाऱ्यांनी मृत बिबट्याची पाहणी केली. त्यावेळी बिबट्याचा मृत्यू नैसर्गिकरित्या न्यूमोनियाने झाला असल्याची शक्यता वर्तवली आहे. रात्री उशिरा उंब्रज येथील पशुवैद्यकीय अधिकारी डॉ. विजय भोसले घटनास्थळी दाखल झाले असून जागीच शवविच्छेदन करण्यात येणार असल्याची माहिती वनविभागाचे वनक्षेत्रपाल अर्जुन गमरे यांनी दिली.

संपादन : बाळकृष्ण मधाळे