वाई (जि. सातारा) : वाई-पाचवड रस्त्यावर बावधन ओढा येथे मोटारीने दुचाकीला धडक दिल्याने दोघे गंभीर जखमी झाले. रविवारी (ता. 3) दुपारी दोनच्या सुमारास हा अपघात झाला. जखमींना उपचारासाठी सातारा येथील खासगी रुग्णालयात दाखल केले असून, मोटार चालकावर पोलिसात गुन्हा दाखल झाला आहे. या अपघाताचे क्षण कॅमेऱ्यात कैद झाले आहेत. 

वनिता प्रवीण भोसले (वय 35, केसरकर पेठ, सातारा) यांनी दिलेल्या फिर्यादीवरून त्या व त्यांचे पती प्रवीण हे दोघे होंडा ऍक्‍टिव्हा (एमएच 11 बीवाय 6062) वरून रविवारी दुपारी वाईला किसन वीर महाविद्यालयात पुस्तके आणण्यासाठी आले होते. प्रवीण हे गाडी चालवत होते. वनिता या चार महिन्यांच्या गर्भवती आहेत. तेथील काम झाल्याने परत साताऱ्याच्या दिशेने निघाले होते. 

महाबळेश्‍वरात वाहनांवर कारवाई; मुख्याधिकाऱ्यांच्या भूमिकेचं नागरिकांकडून कौतुक

बावधन ओढ्यानजीक दोन वाजण्याच्या सुमारास साताऱ्याहून वाईकडे येणाऱ्या मोटारीने त्यांच्या दुचाकीला जोरदार धडक दिली. त्यात वनिता व प्रवीण हे दोघेही दुचाकीवरून लांब फेकले गेल्याने गंभीर जखमी झाले. त्यांना ग्रामस्थांनी सातारा येथील खासगी रुग्णालयात दाखल केले. मोटारचालक राजेंद्र रामचंद्र रसाळ (रा. सह्याद्रीनगर) यांच्यावर वाई पोलिसात गुन्हा दाखल करण्यात आला आहे. पोलिस नाईक सुभाष धुळे हे तपास करत आहेत. 

संपादन : बाळकृष्ण मधाळे