सातारा : कराडजवळ सहापदरीकरणाचं काम सुरू झालं असून कोल्हापूर नाक्यावरील पूल काही दिवसांपूर्वीच पाडण्यात आला. या कामामुळं कोल्हापूर, पुणे, सांगलीकडं होणारी वाहतूक विलंबानं सुरु आहे.

त्यातच आता शनिवार आणि रविवार अशी जोडून सुट्टी असल्यामुळं आज शुक्रवारपासूनच (ता. 7) रस्त्यावर वाहनांच्या लांबलचक रांगा पहायला मिळाल्या. खंडाळा घाटात मोठ्या प्रमाणात वाहतूक ठप्प होत आहे.

शनिवार-रविवार अशी जोडून सुट्टी असल्यामुळं लोक फिरायला जायचा प्लान आखत आहेत, त्यामुळं पुढील दोन दिवस पुणे-बंगळुरु महामार्ग (Pune-Bangalore Highway) ठप्प होण्याची शक्यता आहे. कर्नाटकातही सध्या महामार्गाचं काम जोरात सुरु असून काही ठिकाणी वाहतूक ठप्प होताना दिसत आहे, त्यामुळं वाहनधारकांना ट्राफिक जामचा त्रास सहन करावा लागत आहे.

या एप्रिल महिन्यात बऱ्याच सुट्ट्या असल्यामुळं लोक Long Weekend चा प्लान बनवत आहेत. त्यामुळं या निमित्तानं पुणे-बंगळुरु महामार्गावर वाहनांची मोठी गर्दी पहायला मिळत आहे. दरम्यान, कर्नाटकात जाणाऱ्या वाहनांची पोलीस कसून चौकशी करत आहेत. कारण, कर्नाटकात 10 मे रोजी मतदान असल्यामुळं आणि अचारसंहिता लागू झाल्यामुळं कोगनोळी टोलनाक्यावर तपासणी केली जात आहे. या प्रकारामुळं महाराष्ट्रातील वाहनधारक आपला कर्नाटकातील प्लान रद्द करत आहेत.