म्हसवड (जि.सातारा) : खटावच्या बुध, डिस्कळ भागासह माण तालुक्‍याच्या पूर्व भागात साेमवारी दुपारपासून दमदार पावसाने हजेरी लावली. खरीप हंगामातील विशेषत; जिराईत क्षेत्रात बाजरी व कडधान्य पेरणीस वेळेवर पडलेला पाऊस उपयुक्त असल्याचे मानले जात आहे. दरम्यान, या पावसाने माणगंगाही प्रवाहित झाली आहे.
 
माण तालुका तसा कायम दुष्काळीच संबोधला जातो. हा संपूर्ण तालुका खरिपाचा असून, येथील पिके पावसावरच विसंबून असतात; परंतु मॉन्सूनचा पाऊसच या तालुक्‍यात सहसा होत नाही. परिणामी खरीप हंगामातील पिकांच्या पेरण्यांचे नियोजित वेळापत्रकच कोडमडते. गत वर्षीही खरीप हंगामातील पेरणीस उपयुक्त असा पाऊसच झाला नाही. याउलट सातारा, सांगली व कोल्हापूर जिल्ह्यांच्या पश्‍चिम भागात वारंवार झालेल्या अतिवृष्टीमुळे कोयना, कृष्णा, पंचगंगा नदीस पूर येऊन मोठे नुकसान झाले होते. नेमकी या उलट परिस्थिती माण तालुक्‍यात होती.
 
यंदा मात्र मॉन्सूनच्या पावसाने मेहरबानी केल्यामुळे या तालुक्‍यात खरिपाच्या पेरण्या वेळेवर करण्याची संधी शेतकरी बांधवांना मिळणार आहे. आज दुपारी बारानंतर तालुक्‍यात पावसास सुरुवात झाली. सुमारे तासभर दमदार पावसाने झोडपून काढल्यामुळे गावोगावच्या शिवारात पाणी साचून राहिले. त्यानंतरही सायंकाळपर्यंत पावसाची रिपरिप सुरूच होती. आजच्या पावसाच्या उघडिपीनंतर शिवारात वापसा येताच विशेषत: जिराईत क्षेत्रात बाजरी, भुईमूग, मूग, मटकी आदी पिकांच्या पेरणीची कामे सुरू होतील, अशी अपेक्षा शेतकरी व्यक्त करीत आहेत. दरम्यान, खटाव तालुक्‍याच्या बुध, डिस्कळ भागातही जोरदार पाऊस झाल्याने समाधान व्यक्‍त करण्यात आले.

दहावी नंतर करिअर फक्त कसे निवडावे नव्हेतर कसे घडवावे यासाठी जॉईन करा सकाळ आणि दिशा अकॅडमी, वाई आयोजित वेबिनार

तहानलेल्या गावासाठी ते ठरले भगीरथ

सातारा जिल्ह्यात 150 जणांचे रिपोर्ट आले निगेटिव्ह; एकूण बाधितांची संख्या 767