कास (सातारा) : महाराष्ट्राची 'भाग्यलक्ष्मी' असलेल्या कोयनेच्या (Koyna Dam) शिवसागर जलाशयावर (Shivsagar Reservoir) पूर्णपणे धुक्याची चादर पसरलेली आज पाहायला मिळाली. जलाशयाबरोबरच सह्याद्री पर्वताच्या (Sahyadri Mountain) डोंगररांगा ही धुक्यात न्हाऊन निघाल्या होत्या. जणू, काही बर्फाची पांढरीशुभ्र चादर ओढल्याचा आभास येथे होत होता. अवकाळी पाऊस झाल्यानंतर दुसऱ्याच दिवशी असे नयनरम्य वातावरण येथे तयार झाले होते. (Satara Trending News Foggy Scene Sahyadri Mountains Amazing Climate)

साधारणतः सप्टेंबर, ऑक्टोबर आणि मे, जून महिन्यात असे अद्भुत नजारे पाहण्याचा योग येतो. पहाटेपासून ते साधारणपणे नऊ वाजेपर्यंत हे दृश्य दिसत राहते. सद्यस्थितीत कोरोना लाॅकडाउनमुळे (Corona Lockdown) कास, बामणोली, सह्याद्रीनगर परिसरात पर्यटकांना फिरता येत नसल्याने हा नजारा पाहण्यापासून अनेकांना वंचित राहावं लागतंय. डोंगराच्या उंचावर थांबून खाली अथांग पसरलेलं धुक्याचं ढग पाहताना आभाळाच्या वरती आपण असल्याचा आभास होतो. हा नजारा कितीही वेळ पाहिला, तरी तेथून पाय काढू नये, असेच नैसर्गिक सुंदर वातावरण असते.

सह्याद्रीनगर गावच्या जन्नी देवी मंदिरापासून जवळच असलेल्या कोयना दर्शन पाॅईंटवरून कोयनेचं खोरं पाहणं खूपच सुंदर असतं. त्यात धुक्याची चादर असेल, तर स्वर्गाहून सुंदर नजारा असतो. शासनाने सह्याद्रीनगर येथे पर्यटनाच्या दृष्टीने सोयीसुविधा विकसित कराव्यात.

-जयेश शिंदे, सह्याद्री नगर

Satara Trending News Foggy Scene Sahyadri Mountains Amazing Climate