सातारा : कोरोना (coronavirus) संसर्गापासून संरक्षणासाठी लसीकरण (vaccination) करून घेण्यासाठी अनेक दिवस ताटकळलेल्या तरुणांना (youth) राज्य शासनाच्या निर्णयामुळे दिलासा मिळाला असून, ३० ते ४४ वयोगटातील नागरिकांना लस देण्यासाठी जिल्ह्यातही नियोजन सुरू आहे. लशीच्या उपलब्धतेनुसार जिल्ह्यामध्ये या वयोगटासाठी लसीकरण केंद्रे सुरू करण्यात येणार आहेत. (satara-vaccination-begins-30-44-age-group-marathi-news)
कोरोना संसर्गाशी मुकाबला करण्यात लसीकरण हा महत्त्वाचा टप्पा आहे. त्यामुळे कोरोनाची बाधा होण्याचे प्रमाण कमी होते. परंतु, लसीकरणानंतरही कोरोनाची बाधा झाल्यास संबंधित व्यक्तीचा गंभीर अवस्थेत जाण्यापासून बचाव होतो. त्यामुळे शासनाने नागरिकांच्या लसीकरणाची मोहीम हाती घेतली आहे. सुरवातीला ६० वर्षांवरील व्यक्तींसाठी लसीकरण सुरू करण्यात आले. त्यानंतर ४५ ते ६० वयोगटातील पूर्वीचे आजार असलेल्या नागरिकांसाठी व त्यानंतर ४५ वर्षांवरील सर्वांसाठी लसीकरण सुरू करण्यात आले.
मे महिन्यामध्ये शासनाने १८ ते ४४ वयोगटातील नागरिकांसाठीही लसीकरण सुरू केले. परंतु, लशीची उपलब्धता अत्यंत कमी होती. त्यातच दुसऱ्या डोसची गरज असलेल्यांची संख्या वाढली होती. लसीकरणाचा ताळमेळ बसविण्यासाठी सहा दिवसांतच या वयोगटातील लसीकरण बंद करण्याचा निर्णय शासनाने घेतला. त्यामुळे तरुणांची निराशा झाली होती. सध्या या वयोगटातील लस घेतलेल्यांचा दुसरा डोसही पूर्ण होत आला आहे. त्यामुळे शासनाने तरुणांना लसीकरण सुरू करण्याचा पुन्हा निर्णय घेतला आहे.
केंद्र सरकारने १८ ते ४४ च्या वयोगटातील नागरिकांना २१ जूनपासून लसीकरण करण्याचा निर्णय घेतला आहे. पण, राज्य शासनाने लशींच्या उपलब्धतेचा विचार करून १८ ते ४४ ऐवजी ३० ते ४४ वयोगटातील नागरिकांसाठीच सध्या लसीकरण करण्याचा निर्णय घेतला. कालपासून या लस देण्याच्या सूचना होत्या. त्यानुसार काल जिल्हा रुग्णालयात उपलब्ध असलेले २०० डोस या वयोगाटतील नागरिकांना देण्यात आले. त्यामुळे लस उपलब्ध झाल्यावर या वयोगटाला बंद असलेला लसीकरणाचा मार्ग मोकळा होणार आहे.
जिल्ह्यात आज लसीकरण नाही
सोमवार (ता. २१) या वयोगटातील लसीकरण सुरू करण्याचा जिल्हा प्रशासनाचा विचार होता. परंतु, जिल्ह्याला अद्याप लशींचा साठा उपलब्ध झालेला नाही. त्यामुळे साेमवारी जिल्ह्यात या वयोगटासाठी लस उपलब्ध होणार नाही. लस उपलब्ध झाल्यानंतर जिल्हा रुग्णालयाबरोबर ग्रामीण रुग्णालयांमध्ये या वयोगटाच्या लसीकरणासाठी केंद्रे उभारण्यात येणार आहेत. लसीकरणाला जाताना नागरिकांना सोबत आधारकार्ड न्यावे लागणार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.