विसापूर : महाराष्ट्रासह देशभरातील लाखो भाविकांचे श्रद्धास्थान असलेल्या पुसेगाव येथील श्री सेवागिरी महाराजांच्या ७४ व्या पुण्यस्मरणानिमित्त जानेवारी २०२२ मध्ये पार पडणाऱ्या यात्रा प्रदर्शनास प्रशासनाने परवानगी द्यावी. यंदाच्या यात्रेवर कोरोनाचे निर्बंध चालतील. मात्र, बंदी नको, अशी आक्रमक भूमिका पुसेगावमधील ग्रामस्थांनी प्रदर्शनाच्या नियोजनाबाबत श्री सेवागिरी मंदिरात आयोजित ग्रामसभेत मांडली.

या ग्रामसभेस मठाधिपती सुंदरगिरी महाराज, श्री सेवगिरी देवस्थान ट्रस्टचे अध्यक्ष मोहनराव जाधव, विश्वस्त डॉ. सुरेश जाधव, रणधीर जाधव, सुरेशशेठ जाधव, योगेश देशमुख, प्रताप जाधव, सरपंच विजय मसणे व ग्रामस्थ मोठ्या संख्येने उपस्थित होते.

प्रशासनाने भक्त-भाविकांच्या भावना लक्षात घेऊन यात्रेच्या मुख्य दिवशी श्री सेवागिरी महाराजांच्या पादुका व प्रतिमेची फुलांनी व नोटांच्या माळांनी सजविलेल्या रथातून मिरवणूक काढण्यासाठी परवानगी दिलीच पाहिजे, अशी मागणी ग्रामस्थ राम जाधव यांनी केली. सार्वजनिक समारंभ, राजकीय कार्यक्रम तसेच क्रीडा स्पर्धांना प्रशासन परवानगी देत आहे, त्याच प्रकारे यात्रेच्या कालावधीत आयोजित कार्यक्रमांना प्रशासनाने परवानगी द्यायला हरकत नाही, अशी भूमिका विश्वस्त रणधीर जाधव यांनी मांडली. यावेळी यात्रा झालीच पाहिजे, या मागणीसाठी सभेत ग्रामस्थ आक्रमक दिसून आले.

यावेळी विश्वस्त डॉ. सुरेश जाधव म्हणाले, ‘‘प्रशासन आणि ग्रामस्थांच्या भावनांच्या समन्‍वयातून यात्रा भरावी, यासाठी आम्ही प्रयत्नशील राहणार आहेत. गतवर्षीप्रमाणे प्रशासनाला आमचे सहकार्य असणारच आहे. पण, यात्रा भरलीच पाहिजे, ही आमची आग्रही भूमिका असणार आहे.’’ विशाल माने यांनी प्रास्ताविक केले. मोहनराव जाधव यांनी स्वागत केले तर प्रताप जाधव यांनी आभार मानले.