शिखर शिंगणापूर (जि. सातारा) : महाराष्ट्र, आंध्र प्रदेश, कर्नाटक राज्यांतील भाविकांचे श्रद्धास्थान असलेल्या शिखर शिंगणापूरच्या शिवपार्वतीचा हळदी समारंभ शनिवारी चैत्र शुद्ध पंचमीला साध्या पद्धतीने पोलिस बंदोबस्तात झाला. या वेळी बडवे, (कावडे) जंगम, भंडारगृहमठ संस्थान, कोल्हापूर संस्थान, सातारकर संस्थान, वहिवाटदार ओंकार देशपांडे, चार चौथाई, जिराईतखाने, वाघमोडे, घडशी, कोळी, साळी, दांगट, माळी, शेटे, चौधरी, नाभीक, पाटील, नायकिन असे मानकरी मंडळीनी गर्दी न करता सोशल डिस्टन्सिंग ठेऊन शिवपार्वतीचा हळदी समारंभ साध्या पद्धतीने साजरा केला.

दर वर्षी शिखर शिंगणापूर शंभूमहादेव माता पार्वती यांच्या चैत्र यात्रेचा सोहळा पाडवा ते पौर्णिमा असा दहा दिवसांचा असतो. यातील पंचमीला हळदी, समारंभ अष्टमीला लग्न (ध्वज पागोटे बाधण्याच सोहळा) रात्री 12 वाजता विवाह लागतो. एकादशीला द्वादशीला (बारसीला) अवघड मुंगी घाटातून सासवड पंचक्रोशीतील व इतर कावड चढण्याचा सोहळा होतो. रात्री बाराला महादेवास संत भुतोजी तेली बुवा सासवड याच्यांकडून महादेवास जलाअभिषेक करून यात्रेची सांगत होते. हा सोहळा पाहण्यासाठी सर्व परिसरातून भाविक शिंगणापूरमध्ये गर्दी करतात. या वेळी ढोल, ताशा, तुतारी, पिपाण्या, हलगीच्या आवाजाने व हर हर महादेव गर्जनेने शिंगणापूर नगरी दुमदुमून जाते; परंतु गेल्या वर्षापासून कोरोना संसर्ग रोगामुळे प्रशासनाने यात्रेवर बंदी घातल्याने मंदिर परिसर व नगरी शिंगणापुरात शुकशुकाट पसरला आहे.

Video पाहा : विनाकारण फिरताय मग कोविड टेस्ट करा!