सायगाव (सातारा): सातारा ते पुणे या मार्गावरील वर्ये येथील असणाऱ्या ब्रिटिश कालीन पुलावरील सरक्षक लोखंडी बार तुटल्याने व येथील वाढलेल्या झाडा झुडपामुळे धोकादायक परिस्थिती बनल्याने हा पुल डेंजर झोन बनला आहे.

पुण्याहून साताऱ्याला जाण्यासाठी हा अत्यंत महत्वाचा व जवळचा मार्ग असल्याने या ठिकानाहून मोठी वाहतूक होत असते. तसेच आजुबाजुचे गावातील देखील दररोज हजारो वाहने या मार्गाने ये-जा करत असतात. तीन वर्षापूर्वी येथील वाहतूक सहा महिने बंद ठेवून या ब्रिटिश कालीन पुलाचे बांधकाम काम पूर्ण केले होते, या पुलावर असणारे दगडी सरक्षक भिंती काढून या ठिकाणी लोखंडी सरक्षक बार बसविण्यात आले होते. मात्र गेली वर्ष झाले या ठिकाणी नेमक्या मोठ्या असणाऱ्या वळणावर सातारा दिशेने येताना डाव्या बाजुचे संरक्षक बार निसटले आहेत. तर त्या ठिकाणी वाढलेल्या झाडा झुडुपामुळे अनेक ठिकाणी तुटलेले बार दिसून येत नसल्याने मोठ्या व छोट्या वाहनचालकासाठी अत्यंत धोक्याची परिस्थिती बनली आहे.

या ठिकानाहुन अनेकदा यापूर्वी देखील येथून दुचाकी वाहने पुलावरुन खाली पडून गंभीर अपघात घडले आहेत. मात्र तरीही सबंधित विभाग याकडे अजुनही दुर्लक्ष करत आहे, एखादी मोठी घटना घडण्याची शक्यताही येथील परिस्थिती पाहता नाकारता येत नाही, पुलाच्या दोन्ही बाजूला असणाऱ्या संरक्षक बार भोवती मोठ मोठी झाडे झुडुपे देखील वाढली असल्याने संरक्षक बार दिसेनासे झाले आहेत, त्यामुळे येथे हा स्पॉट डेंजर झोन बनला आहे, लवकरात लवकर येथील संरक्षक बारची दुरुस्ती करून वाढलेली झुडुपे काढावी अशी मागणी पानमळेवाडीचे पोलिस पाटिल राजेन्द्र गोरे, उमेश मोरे, दीपक फरांदे, प्रमोद इंगवले, मनोज इंगवले, शिवाजी शिवनकर, सुभाष पाडळे, जयदेश जगताप, शशिकांत भोसले या वाहन चालकांनी केली आहे.

हा अत्यंत महत्वाचा मार्ग असून या पुलावर या संरक्षक बार नसल्याने अनेक अपघात देखील घडले असून या गंभीर असणाऱ्या गोष्टी संबंधित विभाग दुर्लक्ष करीत आहे, तातडीने या पुलाची दुरुस्ती करावी.

- अनिकेत (चंदू) पवार, युवा नेते आनेवाडी