सातारा : कोरेगाव ग्राम विविध कार्यकारी सहकारी सेवा सोसायटीच्या (Koregaon Society Election) संचालक मंडळाची पंचवार्षिक निवडणूक काल अर्ज मागे घेण्याच्या अखेरच्या दिवशी आमदार महेश शिंदे यांच्या नेतृत्वाखाली बिनविरोध झाली. कोरेगाव नगरपंचायत (Koregaon Nagar Panchayat), कोरेगाव भाग विविध कार्यकारी सहकारी सेवा सोसायटीच्या संचालक मंडळाची निवडणूक नुकतीच चुरशीने झाली. या निवडणुकांच्या पार्श्वभूमीवर कोरेगाव ग्राम सोसायटीच्या संचालक मंडळाची निवडणूक चुरशीने होईल, अशी शक्यता व्यक्त केली जात होती. त्यानुसार उमेदवारी अर्ज दाखल करण्याच्या शेवटच्या दिवसअखेर सोसायटीच्या १३ जागांसाठी ३१ उमेदवारी अर्ज दाखल झाले होते.

मात्र, काल उमेदवारी अर्ज मागे घेण्याच्या अखेरच्या दिवशी अनपेक्षितपणे आमदार महेश शिंदे (Mahesh Shinde) यांच्या नेतृत्वाखाली सातारा जिल्हा मध्यवर्ती सहकारी बँकेचे (Satara Bank) संचालक सुनील खत्री, जिल्हा परिषदेचे माजी सदस्य किरण बर्गे, माजी नगराध्यक्ष राजाभाऊ बर्गे, जिल्हा नियोजन समितीचे सदस्य राहुल बर्गे, उदयसिंह बर्गे, राजेंद्र बर्गे, गुलाबराव बर्गे, संतोष बर्गे आदींनी केलेल्या यशस्वी प्रयत्नांमुळे १३ जागांसाठी १३ उमेदवारी अर्ज उरल्याने निवडणूक बिनविरोध झाली. बिनविरोध निवड झालेल्या संचालकांमध्ये सर्वसाधारण गटातून विठ्ठल रामचंद्र काटे, शिवलिंग विठ्ठल बर्गे, हिंदुराव दादू नांदे, नारायण रामचंद्र बर्गे, संजय प्रल्हाद बर्गे, सयाजी शिवाजीराव बर्गे, शरद विठ्ठल बर्गे, अनिल चंद्रकांत बर्गे, महिला राखीव मतदारसंघातून मालन बाळासाहेब महाडिक, सुमन धर्मराज बर्गे, इतर मागास प्रवर्गातून तानाजी लक्ष्मण नाळे, अनुसूचित जाती जमाती मतदारसंघातून रामचंद्र अप्पासाहेब बोतालजी, विशेष मागास प्रवर्गातून सचिन हणमंत कोकरे या १३ जणांचा समावेश आहे.

निवडणूक निर्णय अधिकारी म्हणून स्वप्नील पाटील यांनी काम पाहिले. त्यांना सोसायटीचे सचिव अतुल धुमाळ आदींनी सहकार्य केले. दरम्यान, निवडणूक बिनविरोध झाल्यानंतर ग्राम सोसायटीच्या कार्यालयासमोर फटाक्यांची आतषबाजी करण्यात आली. त्यानंतर कोरेगाव बाजार समितीच्या सभागृहामध्ये ग्राम सोसायटीच्या नवनिर्वाचित संचालकांचा, तसेच सोसायटीच्या अर्थात शेतकरी सभासदांच्या हितासाठी निवडणूक बिनविरोध करण्यासाठी आपले अर्ज मागे घेतलेल्यांचा प्रातनिधिक स्वरूपात सत्कार सुनील खत्री, किरण बर्गे, राजाभाऊ बर्गे आदींच्या हस्ते करण्यात आला. त्यात श्री. खत्री यांनी जिल्हा बँकेचा संचालक या नात्याने कोरेगाव ग्राम व भाग या दोन्ही सोसायट्यांना सर्वतोपरी सहकार्य करण्याची ग्वाही दिली.