सातारा: बहीण-भावामध्ये न्यायालयात झालेल्या तडजोडीचा हुकूमनामा मुद्रांकित करून देण्यासाठी पाच हजार रुपयांची लाच स्वीकारल्याप्रकरणी मुद्रांक जिल्हाधिकारी कार्यालयातील कनिष्ठ लिपिक महिलेला लाचलुचपत प्रतिबंधक विभागाने अटक केली आहे.

पल्लवी रामदास गायकवाड-कारंडे (रा. पुसेगाव, ता. खटाव) असे संबंधित कनिष्ठ लिपिक महिलेचे नाव आहे. याबाबत तक्रारदाराने काल लाचलुचपत प्रतिबंधक विभागाकडे तक्रार दिली होती. तक्रारदाराच्या वडिलोपार्जित मिळकतीबाबत बहीण-भावामध्ये येथील दिवाणी न्यायालयात दावा सुरू होता. या दाव्यामध्ये भाव-बहिणीमध्ये तडजोड झाली होती. त्याबाबतचा हुकूमनामा त्यांनी नोंदीसाठी सैदापूर येथील तलाठी कार्यालयात सादर केला होता.

त्या वेळी तलाठी यांनी तो हुकूमनामा मुद्रांकित करून आणण्यास सांगितले होते. तलाठ्याच्या सांगण्यानुसार त्यांनी तो हुकूमनामा मुद्रांकित करण्यासाठी मुद्रांक जिल्हाधिकारी कार्यालयात अर्ज दाखल केला होता. हा अर्ज चुकविलेला मुद्रांक शुल्क या कामाचा पदभार असलेल्या गायकवाड यांच्याकडे गेला होता.

हे काम करण्यासाठी त्यांनी पाच हजार रुपये लाचेची मागणी केली होती. त्यानुसार आज पाच हजार रुपयांची लाच स्वीकारल्याप्रकरणी गायकवाड यांना पकडले. याप्रकरणी गुन्हा दाखल करण्याची प्रक्रिया सुरू होती. लाचलुचपत प्रतिबंधक विभागाचे उपअधीक्षक राजेश वाघमारे, निरीक्षक सुनील पाटील, हवालदार राजपुरे, थोरात, महिला हवालदार जाधव, गुरव हे सहभागी होते.