Ancient Virus found in Tibet Glaciers : एकीकडे कोरोनाच्या नव्या व्हेरियंटची भीती कमी झालेली नसतानाच, भारतासमोर आणखी एक मोठं संकट उभं ठाकण्याची शक्यता आहे. तिबेटमधील काही हिमनद्या वितळू लागल्या आहेत. यामुळे हजारो वर्षांपूर्वी बर्फात अडकलेले विषाणू आता समोर आले आहेत. काही दिवसांपूर्वी रशियामध्ये असा 40 हजार वर्षांपूर्वीचा विषाणू मिळाला होता. मात्र, आता भारतापासून अघदी जवळ असा विषाणू मिळाल्यामुळे शास्त्रज्ञांनी चिंता व्यक्त केली आहे.

तिबेटच्या पठाराजवळ असणाऱ्या गुलिया आइस कॅपजवळ (Guliya Ice Cap) शास्त्रज्ञांना 15 हजार वर्षांपूर्वीचे विषाणू मिळाले आहे. विशेष म्हणजे याठिकाणी एकाच नव्हे तर अनेक प्रकारचे विषाणू (Tibet Virus) मिळाले आहेत. यातील कित्येक विषाणू अजूनही जिवंत असल्याची माहिती ओहायो स्टेट युनिवर्सिटीचे मायक्रोबायोलॉजिस्ट झी-पिंग झॉन्ग यांनी दिली. आज तकने याबाबतचं वृत्त प्रसिद्ध केलं आहे.

33 विषाणू, 28 अज्ञात..

समुद्रसपाटीपासून सुमारे 22 हजार फूट उंचीवर हे विषाणू मिळाले आहेत. शास्त्रज्ञांना याठिकाणी 33 प्रकारचे विषाणू मिळाले. यातील 28 विषाणूंबाबत वैज्ञानिकांकडे कोणतीही माहिती उपलब्ध नाही. म्हणजेच या विषाणूंचे संक्रमण झाल्यास त्यावर कोणतंही औषध उपलब्ध नाही. (Unknown Bacteria in Tibet)

कोणत्याही गोष्टीचा परिणाम नाही

ओहायो विद्यापीठातील दुसरे वैज्ञानिक मॅथ्यू सुलिवन यांनी म्हटलं, की हे विषाणू अगदी प्रतिकूल परिस्थितीमध्येही तग धरून राहिले आहेत. हजारो वर्षे बर्फाखाली दबले जाऊनही त्यांच्यावर कोणता परिणाम झालेला नाही. कोणत्याही प्रकारचं वातावरण या विषाणूंवर परिणाम करू शकत नाही, त्यामुळे यांवर कशाचाच परिणाम होत नाही. ही आपल्यासाठी धोक्याची घंटा ठरू शकते, असं शास्त्रज्ञांनी म्हटलं आहे. (Tibet Bacteria found in Glacier)

बॅक्टेरियाच्या प्रजाती

गेल्या वर्षीदेखील तिबेटच्या ग्लेशिअरमधून सुमारे 1000 प्रकारचे बॅक्टेरिया मिळाले होते. हे ग्लेशिअर वितळले तर त्याचं पाणी भारत आणि चीनच्या नद्यांमध्ये मिसळणार आहे. हे बॅक्टेरिया मिश्रित पाणी प्यायल्याने विषाणूंचा संसर्ग होण्याची शक्यता वैज्ञानिकांनी व्यक्त केली आहे. सध्या ग्लोबल वॉर्मिंगमुळे हे ग्लेशिअर वितळण्याचा वेगही वाढला आहे. भारत, चीन आणि म्यानमार अशा देशांसाठी हा भविष्यात धोका ठरू शकतो असं मत वैज्ञानिकांनी व्यक्त केलं आहे.