Chandrayaan-3 Landing : भारताची महत्त्वाकांक्षी मोहीम चांद्रयान-3 आता अंतिम टप्प्यात पोहोचली आहे. चंद्राच्या दक्षिण ध्रुवावर उतरून इतिहास रचण्यासाठी भारत सज्ज झाला आहे. ऑटोमॅटिक लँडिंग सिक्वेन्स सुरू करण्यासाठी इस्रोमधील वैज्ञानिक सज्ज झाले आहेत. आता केवळ लँडर मॉड्यूल हे अपेक्षित ठिकाणी पोहोचण्याची प्रतीक्षा करावी लागणार आहे.

इस्रोने एक्स पोस्ट करत याबाबत माहिती दिली. ALS कमांड मिळाल्यानंतर लँडर मॉड्यूलमधील इंजिन सुरू होतील, आणि ते खाली उतरण्यास सुरुवात करेल. यावेळी मिशन ऑपरेशन्स टीम या संपूर्ण प्रक्रियेवर लक्ष ठेऊन असेल, असंही इस्रोने स्पष्ट केलं.

कसा राहिला प्रवास?

चांद्रयान-2 अगदी शेवटच्या टप्प्यात जाऊन चंद्रावर क्रॅश झालं होतं. त्यानंतर इस्रोने खचून न जाता, लगेच चांद्रयान-3 मोहिमेची तयारी सुरू केली होती. त्यानंतर, सुमारे चार वर्षं या मोहिमेवर काम सुरू होतं. अखेर, यावर्षी सहा जुलै रोजी इस्रोने बहुप्रतिक्षित चांद्रयान-3 लाँचिंगची तारीख जाहीर केली होती.

14 जुलै रोजी लाँचिंग होण्यापूर्वी, 11 जुलै रोजी चांद्रयान-3 मोहिमेची रंगीत तालीम घेण्यात आली. यामध्ये यानाच्या सर्व चाचण्या यशस्वीरित्या पार पाडण्यात आल्या. अखेर, 14 जुलै रोजी दुपारी 2.35 मिनिटांनी चांद्रयान-3 लाँच करण्यात आलं. यासाठी LMV-3 या भारताच्या विश्वासू आणि शक्तिशाली रॉकेटचा वापर करण्यात आला.(Latest Marathi News)

यानंतर 15 जुलै, 17 जुलै, 18 जुलै, 20 जुलै आणि 25 जुलै या दिवशी टप्प्याटप्प्याने चांद्रयान पृथ्वीच्या बाहेरच्या कक्षांमध्ये ढकलण्यात आलं. 1 ऑगस्ट रोजी चांद्रयान पृथ्वीच्या कक्षेतून बाहेर पडलं आणि चंद्राच्या दिशेने रवाना झालं.

5 ऑगस्ट रोजी चांद्रयान-3 हे चंद्राच्या कक्षेत पोहोचलं. यानंतर त्याने चंद्राच्या कक्षांमधून पृष्ठभागाच्या दिशेने प्रवास सुरू केला. 17 ऑगस्टला चांद्रयानातील लँडर मॉड्यूल आणि प्रॉपल्शन मॉड्यूल एकमेकांपासून वेगळे झाले. यानंतर 18 ऑगस्टला चांद्रयानाची पहिली डीबूस्टिंग प्रक्रिया पार पडली. 20 ऑगस्टला दुसरी डीबूस्टिंग प्रक्रिया पार पडली, आणि विक्रम लँडरने चंद्रावर उतरण्यासाठी जागा शोधू लागलं.