मानवी मेंदूमध्ये कम्प्युटर चिप बसवण्यासाठी इलॉन मस्कची 'न्यूरालिंक' कंपनी गेल्या कित्येक वर्षांपासून संशोधन करत आहे. यावर्षी मे महिन्यामध्ये अमेरिका सरकारने या प्रयोगाची मानवी चाचणी करण्यासाठी परवानगी दिली होती. यानंतर आता कंपनी यासाठी पेशंटचा शोध घेत आहे.

अमेरिकेच्या अन्न व औषध प्रशासन विभागाने (FDA) मानवी चाचणीला सशर्त परवानगी दिली होती. यामध्ये त्यांनी अशी अट ठेवली होती. की केवळ एमियोट्रोफिक लॅटरल स्क्वेरोसिस (एएलएस) या आजारामुळे लकवाग्रस्त झालेल्या रुग्णांवरच याची चाचणी करण्यात यावी. प्रसिद्ध वैज्ञानिक स्टीफन हॉकिंग यांनादेखील अशाच आजाराची लागण झाली होती.

त्यामुळे आता Neuralink कंपनी अशा प्रकारच्या रुग्णांचा शोध घेत आहे. अशा दहा रुग्णांवर प्रयोग करण्याची परवानगी इलॉन मस्कने मागतली आहे. मात्र, एफडीएने किती रुग्णांच्या चाचणीची परवानगी दिली आहे याबाबत अद्याप माहिती मिळाली नाही.

कसा होणार फायदा?

एएलएस आजारामुळे शरीराची हालचाल करू न शकणाऱ्या रुग्णांना याचा सर्वाधिक फायदा होणार आहे. तसेच विविध प्रकारच्या दिव्यांग्य व्यक्तींना देखील या चिपचा फायदा होईल असं सांगण्यात येत आहे. या चिपच्या माध्यमातून लोक केवळ विचार करुन कम्प्युटर माउस किंवा कीबोर्ड कंट्रोल करू शकणार आहेत. यामुळे अधिक चांगल्या प्रकारे संशोधन करता येणार आहे.

काय आहे न्यूरालिंक?

न्यूरालिंकची स्थापना 2016 साली करण्यात आली होती. ही न्यूरोटेक कंपनी इलॉन मस्कच्याच मालकीची आहे. इम्प्लांटेबल ब्रेन-कम्प्युटर इंटरफेस विकसीत करण्यासाठी ही कंपनी काम करत आहे. मानवी चाचणी पूर्ण करण्यासाठी पुढील सहा वर्षे लागू शकतात असं कंपनीने म्हटलं आहे.