Facebook : एलोन मस्कने ट्वीटरची सूत्रं जेव्हापासून हाती घेतली, तेव्हापासून तंत्रज्ञानाशी निगडीत कंपन्यांमध्ये कर्मचारी कपातीचा सपाटा सुरू असल्याचे दिसत आहे. हजारो लोकांना बाहेरचा रस्ता दाखवल्यानंतर फेसबुकची मालक असणारी ‘मेटा’ कंपनी पुन्हा कर्मचारी कपात करणार आहे.

मेटा कंपनीने जवळपास ११ हजार जणांना बाहेरचा रस्ता दाखवला होता. आपल्या १३ टक्क्यांपेक्षा जास्त कर्मचाऱ्यांना नोकरीवरून काढले. मेटा कंपनीने आपल्या १८ वर्षांच्या इतिहासात पहिल्यांदा एवढ्या मोठ्या प्रमाणावर कर्मचाऱ्यांना बाहेरचा रस्ता दाखवला होता.

फायनान्शिअल टाईम्समध्ये दिलेल्या वृत्तानुसार, मेटामध्ये काम करणाऱ्या कर्मचाऱ्यांवर सध्या टांगती तलवार आहे. आता पुन्हा कपातीची चिंता सतावू लागली आहे. येत्या काळात मेटामध्ये ही कर्मचारी कपात दुसऱ्यांदा होणार आहे.

अलीकडे मेटामध्ये कर्मचाऱ्यांच्या कामाचे पुनरावलोकन करण्यात आले. वॉल स्ट्रीट जर्नलच्या अहवालानुसार सुमारे ७००० कर्मचार्‍यांना त्यांच्या कामगिरीच्या पुनरावलोकनांवर आधारित मेटाने 'सबपार' श्रेणी दिली आहे. शिवाय मेटाने बोनस मेट्रिक देखील बंद केले आहेत. कमी रेटिंग मिळाल्याचा अर्थ असा आहे की मेटामधून अधिक कर्मचाऱ्यांना काढलं जाईल. त्यामुळे पुन्हा एकदा कपातीची शक्यता वर्तवली जात आहे.

पण ही कपात केवळ मेटामध्येच नाही, तर अमेरिकेतील अनेक मोठ्या कंपन्यांमध्ये होत आहे. मेटाने नवीन भरती देखील बंद केली आहे. कंपनीचे मानव संसाधन प्रमुख लॉरी गोलर यांनी दिलेल्या माहितीनुसार, काढून टाकलेल्या कर्मचाऱ्यांना नुकसानभरपाई म्हणून ४ महिन्यांचा पगार दिला जाईल.