Video Game to Treat ADHD :

व्हिडिओ गेममुळे लहान मुलांच्या मनावर दुष्परिणाम होतो हे आपण आतापर्यंत ऐकत आलो आहोत. मात्र अमेरिकेतील एका गेमिंग कंपनीने असा दावा केला आहे, की त्यांची व्हिडिओ गेम (Video Game) खेळल्यामुळे लहान मुलांचा विशिष्ट मानसिक आजार बरा होऊ शकतो. अकिली नावाच्या कंपनीने आपल्या एंडेव्हर आरएक्स (EndeavorRx) गेमबाबत हा दावा केला आहे.

या कंपनीने म्हटलं आहे, की ज्या मुलांमध्ये ADHD आजाराची लक्षणे दिसून येतात, त्या मुलांनी ही गेम खेळल्यास त्यांना फायदा होऊ शकतो. ADHD म्हणजे अटेंशन डेफिशिएट हायपर अ‍ॅक्टिव्हिटी डिसऑर्डर. यामध्ये एखाद्या गोष्टीवर लक्ष केंद्रित करण्याची क्षमता कमी होत जाते. त्यामुळे एखादी गोष्ट समजून घेणे, निर्णय घेणे अशा गोष्टी करता येत नाहीत. लहान मुलांमध्ये या आजाराचं प्रमाण अधिक आहे. (Video Game for ADHD Treatment)

सरकारची परवानगी

विशेष म्हणजे, उपचारांसाठी या गेमची मदत घेण्यास अमेरिकेतील फूड अँड ड्रग्स अ‍ॅडमिनिस्ट्रेशन (FDA) विभागाने ग्रीन सिग्नल दिला होता. यापूर्वी केवळ 8 वर्षांपेक्षा कमी वयाच्या मुलांसाठी याचा वापर करता येत होता. मात्र आता 8 ते 17 वर्षांपर्यंतच्या मुलांना देखील ही गेम खेळता येणार आहे. अर्थात, यासाठी डॉक्टरचं प्रिस्क्रिप्शन आवश्यक आहे. न्यूज18 ने याबाबतचं वृत्त प्रसिद्ध केलं आहे. (FDA Approved Video Game)

अशी करते काम

ही 25 मिनिटांची गेम आहे, जी एक महिन्यापर्यंत आठवड्यातून 5 वेळा खेळण्याचा सल्ला दिला जातो. या गेममुळे लहान मुलांच्या मेंदूचा व्यायाम होतो, त्यांची लक्ष केंद्रित करण्याची क्षमता वाढते आणि ADHD उपचारांसाठी मदत मिळते असं कंपनीने स्पष्ट केलं आहे. प्रौढ व्यक्तींसाठी देखील या गेमचं एक वेगळं व्हर्जन उपलब्ध आहे, मात्र त्याला अद्याप सरकारची परवागनी मिळालेली नाही.

एफडीएने केलेल्या सर्व्हेमध्ये असं दिसून आलं होतं, की या गेमचा वापर करणाऱ्या 73 टक्के मुलांमध्ये याचा सकारात्मक परिणाम दिसून आला. EndeavorRx या गेमचं आयओएस आणि अँड्रॉईड अ‍ॅप डाऊनलोड करून तुम्ही पाच मिनिटांची ट्रायल घेऊ शकता. तसंच याच्या इनसाईट अ‍ॅपच्या मदतीने पालक आपल्या मुलांची प्रोग्रेस ट्रॅक करू शकतात.