आजकाल स्मार्टफोन ही अगदी गरजेची गोष्ट झाली आहे. शाळा ऑफलाईन झाल्या असल्या, तरी कित्येक क्लासेस ऑनलाईन होत आहेत. तसंच सुरक्षेच्या कारणामुळेही आपल्या लहान मुलांकडे स्मार्टफोन देण्याची गरज भासते. मात्र या मोबाईलचा मुलं कसा वापर करतील, त्यातून त्यांना काही धोका तर नाही ना याची चिंता पालकांना असते.

तुम्हालादेखील अशीच चिंता असेल, तर गुगलचं एक फीचर तुमची भरपूर मदत करू शकतं. यामुळे तुमचं मूल स्मार्टफोनवर काय करतंय यावर तुमचं नियंत्रण आणि लक्ष राहणार आहे. गुगल फॅमिली लिंक असं या फीचरचं नाव आहे.

असा करा वापर

गुगलची ही सेवा वापरण्यासाठी तुम्हाला तुमच्या आणि मुलांच्या फोनमध्ये Google Family Link हे अ‍ॅप डाऊनलोड करावे लागेल. यानंतर तुम्ही मुलांच्या वापरासाठी ठराविक नियम लागू करू शकता. तसंच मुलं किती वेळ मोबाईल वापरतील हेदेखील तुम्ही निश्चित करू शकता.

वयानुसार निवडा कंटेंट

मुलं मोबाईल वापरणार म्हणजे इंटरनेट तर उघडणारच. इंटरनेटवरील आक्षेपार्ह गोष्टी आपल्या मुलांपासून दूर ठेवण्यासाठी देखील तुम्ही या अ‍ॅपच्या मदतीने सेटिंग करू शकता.

मुलांच्या वयानुसार योग्य असणारा कंटेंटच त्याला दिसेल, अशी सेटिंग या अ‍ॅपमध्ये करता येते. म्हणजेच, एकदा तुम्ही या अ‍ॅपमध्ये मुलाचं वय निश्चित केलं, की त्या फोनमध्ये गुगलवर त्या वयाशी अनुसरुन सर्च रिझल्ट दिसेल.

मुलांची लोकेशन कळेल

गुगल फॅमिली लिंक या अ‍ॅपच्या मदतीने तुम्ही मुलांच्या स्मार्टफोनची लोकेशन तपासू शकता. म्हणजेच, मुलं घराबाहेर असतानाही ती कुठे जात आहेत याकडे तुमचं लक्ष राहील. एवढंच नाही, तर तुमच्या मुलांच्या फोनमध्ये किती चार्जिंग शिल्लक आहे हेदेखील तुम्हाला कळणार आहे.