गुगल हे नेहमीच आपल्या यूजर्सची लोकेशन ट्रॅक करत असतं. भले मग तुम्ही अँड्रॉईड फोन वापरत असाल, किंवा कम्प्युटरवर गुगल वापरत असाल. तुमची लोकेशन अ‍ॅक्सेस करण्याची परवानगी गुगल मागतंच. कित्येक वेळा यूजर्स ही परवानगी नाकारतात.

जेव्हा आपण गुगलला लोकेशन अ‍ॅक्सेसची परवानगी नाकारतो, तेव्हा गुगलने आपल्या लोकेशनचा डेटा ट्रॅक न करणं अपेक्षित आहे. मात्र, गुगलने याबाबत आपल्या यूजर्सची फसवणूक केल्याचा आरोप कंपनीवर करण्यात आली आहे. यासाठी कोर्टाने गुगलला तब्बल 93 मिलियन डॉलर्स, म्हणजे सुमारे 7,000 कोटी रुपये दंड ठोठावला आहे.

कॅलिफोर्नियाचे अ‍ॅटॉर्नी जनरल रॉब बोंटा यांनी हा खटला दाखल केला होता. यूजर्सना आपल्या लोकेशन डेटावर कंट्रोल असल्याचं भासवून गुगलने आपल्या यूजर्सची दिशाभूल केल्याचा आरोप यामध्ये करण्यात आला होता. गुगल यूजर्सची लोकेशन कधी आणि कशा प्रकारे ट्रॅक करतं, त्यातील कोणती आणि किती माहिती सेव्ह केली जाते; याबाबत कंपनीने ग्राहकांची दिशाभूल केली आहे.

गुगलने फेटाळले आरोप

गुगलने मात्र हे सर्व आरोप फेटाळले आहेत. मात्र, तडजोड म्हणून कंपनी 93 मिलियन दंड देण्यास तयार झाली आहे. विविध मीडिया रिपोर्ट्समध्ये याबाबत माहिती देण्यात आली आहे. हे प्रकरण जुन्या प्रॉडक्ट पॉलिसीबाबत होतं, ज्यांना गुगलने आता अपडेट केलं आहे; असं गुगलचे प्रवक्ता जोस कास्टानेडा यांनी म्हटलं आहे.