तुम्ही व्हॉट्सअ‍ॅप वापरत असाल, तर तुम्हाला 'रीड रिसिप्ट' हे फीचर माहिती असेल. समोरच्या व्यक्तीने तुमचा मेसेज वाचला आहे की नाही हे डबल ब्लू टिकमुळे समजतं. व्हॉट्सअ‍ॅपवर हे 'ब्लू टिक' बंदही करता येतं. त्यामुळे आपण मेसेज वाचला आहे की नाही हे समोरच्या व्यक्तीला समजत नाही. आता अशाच प्रकारचं फीचर इन्स्टाग्रामवर देखील येणार आहे.

सध्या या फीचरची चाचणी सुरू असल्याची माहिती इन्स्टाग्रामचे प्रमुख अ‍ॅडम मोसेरी यांनी दिली आहे. इन्स्टाग्राम आणि व्हॉट्सअ‍ॅप हे दोन्ही अ‍ॅप्स मेटाच्या मालकीचे आहेत. मोसेरी यांनी सांगितलं, की हे फीचर ऑप्शनल असणार आहे. रीड रीसिप्ट चालू ठेवायची की बंद याचा निर्णय यूजर्सना घेता येणार आहे.

हे फीचर उपलब्ध झाल्यानंतर प्रायव्हसी सेटिंगमध्ये याबाबत ऑप्शन मिळणार आहे. यासोबतच इन्स्टाग्रामच्या मेन्यूमध्ये देखील काही बदल करण्यावर काम सुरू आहे. हे फीचर कधी लाँच होणार याबाबत मोसेरी यांनी कोणतीही माहिती दिलेली नाही. (Tech News)

व्हॉट्सअ‍ॅपवर दिसणार जाहिराती?

दरम्यान व्हॉट्सअ‍ॅप ब्राझीलचे प्रमुख विल कॅथकार्ट यांनी एक मोठी माहिती दिली आहे. इन्स्टाग्रामप्रमाणेच आता व्हॉट्सअ‍ॅपमध्ये देखील जाहिराती दिसण्याची शक्यता आहे. या जाहिराती चॅनल्स आणि स्टेटसमध्ये दिसू शकतात असे संकेत विल यांनी दिले आहेत. हे कधीपासून होणार याबाबत कोणतीही माहिती त्यांनी दिली नाही.