नवीन वर्षाची सुरुवात महत्त्वपूर्ण बदलांसह झाली आहे. 1 जानेवारी 2025 पासून डिजिटल व्यवहार, व्हॉट्सअ‍ॅप आणि Amazon Prime Video यांसाठी नवे नियम लागू करण्यात आले आहेत. या बदलांमुळे वापरकर्त्यांसाठी अधिक सोयीस्कर व सुरक्षित अनुभव निर्माण होणार असला तरी काही अटी व निर्बंधांची अंमलबजावणी करण्यात आली आहे.

UPI व्यवहारात वाढलेली मर्यादा

रिझर्व्ह बँक ऑफ इंडियाने (RBI) UPI 123Pay सेवेसाठी व्यवहार मर्यादेत मोठा बदल केला आहे. याआधी फिचर फोन वापरकर्त्यांसाठी एका व्यवहारासाठी 5,000 रुपयांची मर्यादा होती, जी आता 10,000 रुपयांपर्यंत वाढविण्यात आली आहे. स्मार्टफोन वापरकर्त्यांसाठी दररोज 1 लाख रुपयांची व्यवहार मर्यादा कायम आहे. तसेच, हॉस्पिटल सारख्या अत्यावश्यक सेवांसाठी ही मर्यादा 5 लाख रुपयांपर्यंत वाढवण्यात आली आहे.

व्हॉट्सअ‍ॅप सपोर्ट

1 जानेवारीपासून व्हॉट्सअ‍ॅपने Android KitKat या दशकभर जुन्या ऑपरेटिंग सिस्टिमसाठी समर्थन थांबवले आहे. जुने ऑपरेटिंग सिस्टिम सुरक्षेच्या दृष्टिकोनातून असुरक्षित असल्याने Meta ने हा निर्णय घेतला आहे. सॅमसंग, मोटोरोला, एचटीसी, एलजी आणि सोनीसारख्या ब्रँडच्या Android KitKat वापरणाऱ्या डिव्हाइसवर आता व्हॉट्सअ‍ॅप कार्यरत राहणार नाही. यामुळे वापरकर्त्यांना नवे स्मार्टफोन घेतल्याशिवाय पर्याय राहणार नाही.

Amazon Prime Video वापरासाठी नवीन अटी

Amazon Prime Video ने एका वेळी दोन टीव्हीवर कंटेंट पाहण्याची मर्यादा लागू केली आहे. आता जर दोनहून अधिक टीव्हीवर कंटेंट पाहायचा असेल, तर त्यासाठी अतिरिक्त सदस्यत्व घ्यावे लागेल. मोबाइल डिव्हाइससाठी ही मर्यादा लागू आहे की नाही, याबाबत अद्याप माहिती देण्यात आलेली नाही.

हे बदल वापरकर्त्यांचा अनुभव अधिक सुरक्षित व सोयीस्कर बनवण्यासाठी आहेत. मात्र, या नवीन नियमांची माहिती घेऊन आवश्यक ते बदल करण्याची गरज आहे, जेणेकरून सेवांचा व्यत्यय न होता लाभ घेता येईल.

तुमच्या सेवांचा लाभ घेत राहण्यासाठी या नव्या नियमांनुसार आवश्यक त्या सुधारणा करायला विसरू नका!