Honda Amaze 2024 : होंडा कंपनी आपली लोकप्रिय सब-कॉम्पॅक्ट सेडान, नेक्स्ट जनरेशन होंडा अ‍मेज भारतात लाँच झाली आहे. या कारच्या डिझाइनपासून ते तांत्रिक फिचर्सपर्यंत अनेक मोठे बदल करण्यात आले आहेत. तसेच, काही विभागात पहिल्यांदाच सादर होणाऱ्या सुरक्षा तंत्रज्ञानामुळे ही कार बाजारात विशेष लक्षवेधी ठरली आहे.

नवीन होंडा अ‍मेजचे डिझाइन

2024 होंडा अ‍मेजचे बाह्य डिझाइन खूपच आधुनिक आणि आकर्षक आहे. या गाडीत मोठ्या हेक्सागोनल ग्रिलसह जाड क्रोम पट्टी आहे, जी होंडाच्या एलिवेट एसयूव्हीशी साधर्म्य दाखवते. मागील बाजूस सुधारित एलईडी टेल लाइट्स आहेत, जे सिटी मॉडेलसारखे भासतात. या गाडीची स्पोर्टी लुकची सडपातळ रचना कायम ठेवण्यात आली असून, नवीन अ‍ॅलोय व्हील्सची जोड दिली जाऊ शकते.

डिझाइनच्या बाबतीत बाहेरच्याच प्रमाणे अ‍मेजच्या केबिनमध्येही मोठे बदल करण्यात आले आहेत. सुधारित डॅशबोर्ड आणि नवीन सेंटर कन्सोल एलिवेटच्या डिझाइनशी साधर्म्य दर्शवतात. त्याशिवाय, फ्लोटिंग इन्फोटेनमेंट युनिट, स्टायलिश एसी वेंट्स आणि सुधारित तीन-स्पोक स्टीअरिंग व्हील यामुळे केबिन अधिक मोहक बनले आहे. यामध्ये काळ्या आणि बेज रंगाच्या थीमला सिल्व्हर अ‍ॅक्सेंट्सने पूरक ठेवलं आहे.

अतिरिक्त फिचर्स

नवीन होंडा अ‍मेज अनेक अत्याधुनिक फिचर्ससह सुसज्ज आहे. यामध्ये 8-इंच टचस्क्रीन इन्फोटेनमेंट सिस्टम, अ‍ॅपल कारप्ले/अँड्रॉइड ऑटो सपोर्ट, वायरलेस फोन चार्जर, मल्टी-स्पीकर ऑडिओ सिस्टम, टाईप-सी चार्जिंग पोर्ट्स आणि सनरूफचा समावेश आहे.

सुरक्षिततेच्या दृष्टीनेही ही कार विशेष ठरते. यात ADAS प्रणाली असून, लेन-कीप असिस्ट, ब्लाइंड स्पॉट डिटेक्शन, आणि फॉरवर्ड कोलिजन वॉर्निंग यांसारखी वैशिष्ट्ये आहेत. याशिवाय, 6 एअरबॅग्स, ABS सह EBD, इलेक्ट्रॉनिक स्टॅबिलिटी कंट्रोल आणि रिव्हर्स पार्किंग सेन्सर्सही देण्यात आले आहेत.

इंजिन व परफॉर्मन्स

2024 अ‍मेजमध्ये 1.2-लिटर नैसर्गिक पेट्रोल इंजिन असून, 90 पीएस पॉवर आणि 110 एनएम टॉर्क निर्माण करण्याची क्षमता आहे. यामध्ये 5-स्पीड मॅन्युअल आणि सीव्हीटी ऑटोमॅटिक गिअरबॉक्स पर्याय उपलब्ध असतील.

किंमत आणि स्पर्धा

नवीन होंडा अ‍मेजची किंमत सुमारे 7.40 लाख रुपयांपासून (एक्स-शोरूम) सुरू आहे. सध्याच्या मॉडेलच्या तुलनेत किंमतीत थोडी वाढ असली, तरीही या गाडीचा मुख्य स्पर्धक मारुती डिझायर, टाटा टिगोर, आणि ह्युंदाई ऑरा असणार आहे.