Bike Buying Tips: आजच्या काळात घरी दुचाकी असणं ही चैन नाही तर गरजेची बाब झाली आहे. यामुळेच बाईक खरेदी करण्याकडे लोकांचा कल वाढला आहे. ज्यांचं बजेट जास्त नाही ते लोक सेकंड हँड बाईकचा पर्याय निवडत आहेत. मात्र, अशी दुचाकी खरेदी करताना खबरदारी घेणं गरजेचं असतं.

तुम्हीदेखील सेकंड हँड बाईक घेण्याचा विचार करत असाल, तर ही बातमी तुमच्यासाठी आहे. दुचाकी खरेदी करताना कोणत्या गोष्टींची खबरदारी घ्यावी याची माहिती आम्ही तुम्हाला देणार आहोत. या टिप्स फॉलो केल्यास तुमचा भरपूर फायदा होऊ शकतो.

बजेट

सेकंड हँड दुचाकी खरेदी करण्यासाठी सगळ्यात आधी तुम्हाला एक बजेट ठरवावं लागेल. त्यानुसार तुम्ही बाईकची कंपनी, क्षमता आणि इतर गोष्टींकडे लक्ष देऊ शकता. यामुळे तुमच्या बजेटमध्ये परफेक्ट अशी बाईक तुम्हाला मिळू शकेल. (Second Hand Bike)

रिसर्च

बाईक घेण्यापूर्वी त्याबद्दल जमेल तितकी माहिती घेण्याचा प्रयत्न करा. यासाठी तुम्ही इंटरनेटची मदत घेऊ शकता. कोणती सेकंड हँड बाईक उत्तम आहे याची माहिती देणाऱ्या कित्येक वेबसाईट्स उपलब्ध आहेत. यामुळे तुम्ही तुमच्या बजेट आणि गरजेनुसार योग्य बाईक निवडू शकता.

कंपनी

तुम्ही कोणत्या कंपनीची बाईक घेत आहात हेदेखील पाहणं गरजेचं आहे. तुम्ही घेत असलेल्या गाडीच्या कंपनीचं सर्व्हिस सेंटर जवळ आहे याची खात्री करा. अन्यथा, भविष्यात गाडी दुरूस्ती किंवा सर्व्हिसिंगसाठी देखील तुम्हाला दूर जावं लागेल.

टेस्ट राईड

नवीन असो वा जुनी, गाडी खरेदी करताना टेस्ट राईड करणं गरजेचं असतं. जुनी गाडी घेताना तर याची अधिक गरज असते. टेस्ट राईड करताना गाडीचा काही आवाज येतोय का, इंजिन स्मूद आहे का, ब्रेक नीट लागतायत का यासोबतच इतर गोष्टीही तपासून घ्याव्यात.

कागदपत्रं तपासणी

सेकंड हँड बाईक खरेदी करताना आधीच्या मालकाकडे सर्व कागदपत्रं उपलब्ध आहेत का याची खात्री करून घ्यावी. आरसी बुक, विमा, चेसी नंबर, मॅन्युफॅक्चरिंग डेट, पीयूसी सर्टिफिकेट ही कागदपत्रं अप-टू-डेट असल्याची खात्री करावी. यासोबतच, ट्रान्सफर सर्टिफिकेट आणि इतर आवश्यक कागदपत्रं योग्य असल्याची पडताळणी करूनच पेमेंट करावं.