पार्किन्सन या आजारावर वेळीच उपचार करणं आता शक्य होणार आहे. यासाठी तुमची स्मार्टवॉचच उपयोगी ठरणार आहे. यूकेच्या डिमेन्शिया रिसर्च इन्स्टिट्यूटने याबाबत माहिती दिली आहे. यासाठी त्यांनी तब्बल १ लाखांहून अधिक स्मार्टवॉचचा डेटा तपासण्यात आला होता.

कार्डिफ युनिवर्सिटीमध्ये झालेल्या एका परिषदेत याबाबत माहिती देण्यात आली. यासाठी संशोधकांनी यूके बायोबँकमधील डेटा वापरला. यामध्ये सुमारे ५० लाख व्यक्तींचा आरोग्यासंबंधी डेटा रेकॉर्ड केला जातो. या डेटाचे विश्लेषण करण्यासाठी एआयचा वापर करण्यात आला. डॉ. कॅथरीन पेअल यांनी याबाबत बीबीसीला माहिती दिली. (Parkinson's Symptoms)

यासाठी २०१३ ते २०१६ या कालावधीतील १,०३,७१२ स्मार्टवॉच यूजर्सचा डेटा तपासण्यात आला. त्यांच्या केवळ एक आठवड्यातील डेटाचं विश्लेषण करून त्यातील किती व्यक्तींना पुढे जाऊन पार्किन्सन होऊ शकतो याबाबत बरोबर अंदाज लावता आला. अर्थात, यासाठी जगभरातील इतर भागांमध्ये अभ्यास होणं गरजेचं असल्याचं मत संशोधकांनी व्यक्त केलं. जर सगळीकडे समान परिणाम दिसून आले, तर पार्किन्सन ओळखण्यासाठी स्मार्टवॉच नक्कीच फायदेशीर ठरू शकते, असंही ते म्हणाले.

उशीरा होतं निदान

पार्किन्सनच्या लक्षणांमध्ये शारीरिक हालचाली मंद होणे, हात-पाय कापणे, चालताना गती मंदावणे, कमी ऐकू येणे, गोंधळ उडणे अशा बऱ्याच गोष्टींचा समावेश होतो. कित्येक वेळा या लक्षणांकडे उतार वयातील साधारण बाब समजून दुर्लक्ष केलं जातं. त्यामुळे या आजाराचं निदान होण्यास भरपूर उशीर होतो.

परवडणारा पर्याय

या रिसर्च टीममधील आणखी एक संशोधक डॉ. सिंथिया सँडॉर यांनी याबाबत अधिक माहिती दिली. त्या म्हणाल्या, "केवळ एका आठवड्याचा डेटा पाहून लक्षणे दिसण्याच्या सुमारे सात वर्षांपूर्वीच याबाबत माहिती मिळू शकते. त्यामुळे वेळीच उपचार सुरू होऊ शकतात. यूकेमधील सुमारे ३० टक्के लोक स्मार्टवॉच वापरतात. अशा व्यक्तींना पार्किन्सन ओळखण्यासाठी एक विश्वासार्ह आणि परवडणारा पर्याय यामुळे उपलब्ध होऊ शकतो."

भारतातील नागरिकांना फायदा

या रिसर्चमुळे भारतातील नागरिकांना देखील मोठा फायदा होणार आहे. एका रिसर्चनुसार भारतात पार्किन्सनचे सुमारे १० लाख रुग्ण असल्याची माहिती समोर आली आहे. तसेच, देशातील तरुणांमध्येही याचं प्रमाण वाढत असल्याचं समोर आलं आहे.