Swiggy partnership with IRCTC : भारतात दररोज लाखो लोक रेल्वेने प्रवास करत असतात. काही तासांपेक्षा अधिक मोठा प्रवास असेल, तर रेल्वेमध्ये खाण्याचा प्रश्न येतोच. रेल्वेमध्ये मिळणारे पदार्थ सर्वांना आवडतीलच असं नाही. त्यामुळे रेल्वेमध्ये चांगलं जेवण मिळणं ही एक मोठी समस्या होऊन बसते. यावरच आता स्विग्गीने एक उपाय उपलब्ध केला आहे.

स्विग्गी या फूड डिलिव्हरी करणाऱ्या अ‍ॅपने IRCTC सोबत करार केला आहे. यामुळे आता रेल्वेत प्रवास करणाऱ्या व्यक्तींना देखील आपल्या आवडत्या रेस्टॉरंटमधून आवडते पदार्थ थेट सीटपर्यंत ऑर्डर करता येणार आहेत. (Swiggy food delivery in Train)

अशी करता येईल ऑर्डर

जेवण ऑर्डर करण्यासाठी तुम्हाला IRCTC e-catering पोर्टलवर जावं लागेल. याठिकाणी तुमचा PNR नंबर एंटर करावा लागेल. यानंतर तुमच्यासमोर विविध रेस्टॉरंट्सचा पर्याय दिसेल. यापैकी तुम्हाला हवं ते हॉटेल आणि हवी ती डिश सिलेक्ट करून तुम्ही जेवण मागवू शकता. विशेष म्हणजे पेमेंटसाठी तुमच्याकडे ऑनलाईन आणि कॅश ऑन डिलिव्हरी असे दोन्ही पर्याय उपलब्ध असतील. (How to order online food in train)

चार स्थानकांवर उपलब्ध

ही सुविधा सध्या देशातील केवळ चारच रेल्वे स्थानकांवर सुरू करण्यात आली आहे. यामध्ये बंगळुरू, भुवनेश्वर, विजयवाडा आणि विशाखापट्टणम या स्थानकांचा समावेश आहे. येत्या काळात टप्प्या-टप्प्याने ही सुविधा इतर रेल्वे स्थानकांवर देखील सुरू करणार असल्याचं स्विग्गीने स्पष्ट केलं. (Swiggy in-train delivery)

झोमॅटोसोबत आधीच करार

ऑनलाईन फूड डिलिव्हरी पार्टनरसोबत करार करण्याची IRCTC ची ही पहिलीच वेळ नाही. गेल्या वर्षी ऑक्टोबर महिन्यात रेल्वेने Zomato सोबत देखील असाच करार केला होता. देशातील कित्येक रेल्वे स्थानकांवर झोमॅटो देखील फूड डिलिव्हरी देत आहे. (Zomato delivery in Railway)